Land Record Office : भूमी अभिलेख कार्यालये येणार एकाच छताखाली

Pune News : भूमी अभिलेख विभाग कात टाकत आहे. राज्याच्या भूमी अभिलेख विभागाच्या मुख्यालयाची इमारत पुण्यातील येरवडा येथे साकारत असून, ती दोन वर्षांत पूर्ण होणार आहे. अत्याधुनिक पद्धतीच्या या सहा मजली इमारतीत भूमी अभिलेखची विविध कार्यालये एकाच ठिकाणी असणार आहेत. त्याच्या कामाला नुकतीच सुरुवात झाली असून, लवकरच स्थलांतर होण्याची शक्यता आहे.

भूमी अभिलेख विभागाचे राज्याचे कार्यालय सध्या शहरातील मध्यवर्ती इमारतीतील विविध मजल्यांवर आहे. त्यामुळे राज्याच्या विविध भागांतून अभिलेखासंबंधीच्या कामांसाठी येणाऱ्या नागरिकांना मनस्तापाला सामोरे जावे लागते. नागरिकांची ही गैरसोय टाळण्यासाठीच येरवडा येथे नवीन इमारत उभारण्याचा निर्णय या विभागाने घेतला.

या नियोजित इमारतीत जमाबंदी आयुक्त, विभागीय आयुक्त कार्यालय, जिल्हा भूमी अभिलेख आदी विविध कार्यालयांचा समावेश असणार आहे. यामुळे एका कार्यालयातून दुसऱ्या कार्यालयात जा-ये करणे सहजशक्य होणार आहे.

येरवडा येथे अडीच एकराच्या प्रशस्त जागेत ही इमारत उभारली जात असून, तिच्या उभारणीकरिता अंदाजे ६० कोटी रुपये खर्च येणार आहे. या प्रशासकीय इमारतीत विविध नकाशे एकाच ठिकाणी उपलब्ध होतील. इतकेच नव्हे, तर इमारतीच्या भिंतींवर देखील जुन्या नकाशांची रेखाटने असणार आहेत. येथे भूमी अभिलेखासंदर्भातील विविध वस्तू, नकाशे यांचे संग्रहालयच साकारले जाणार आहे. या इमारतीलगतच जमाबंदी आयुक्तांचे निवासस्थान असणार आहे.