Parbhani News:्थितीत पुढील तीन महिन्यांच्या कालावधीत बिंदू नामावलीनुसार सुधारित आकृतिबंध आराखडा तयार करून वसंतराव नाईक मराठवाडा कृषी विद्यापीठातील पदभरतीची कार्यवाही तत्काळ करण्यात यावी अशी सूचना विभागाला केली आहे, अशी माहिती कृषिराज्यमंत्री आशिष जयस्वाल यांनी सोमवारी (ता. २४) विधान परिषदेत दिली.

छत्रपती संभाजीनगर पदवीधर मतदार संघाचे आमदार तथा वसंतराव नाईक मराठवाडा कृषी विद्यापीठ कार्यकारी परिषदेचे सदस्य सतीश चव्हाण यांच्या लक्षवेधीला श्री. जयस्वाल यांनी उत्तर दिले.

वसंतराव नाईक मराठवाडा कृषी विद्यापीठातील रिक्त पदांबाबतचे वृत्त ‘अॅग्रोवन’च्या २३ जानेवारीच्या अंकात प्रसिद्ध झाले होते. या वृत्ताची दखल घेत आमदार चव्हाण यांनी सोमवारी (ता. २४) विधान परिषदेत रिक्त पदांची भरती केव्हा करणार, असा प्रश्‍न लक्षवेधीद्वारे विचारला. चव्हाण म्हणाले, की वसंतराव नाईक मराठवाडा कृषी विद्यापीठातील ६० टक्के जागा रिक्त आहेत.

एका एका प्राध्यापकांकडे तीन ते चार पदांचा प्रभार आहे. शेतकऱ्यांना वेळेवर सल्ला मिळत नाही. मागील चार वर्षांत चार नवीन महाविद्यालये सुरू झाली आहेत. आहे त्या महाविद्यालयात शिक्षक नाहीत. दरवर्षी आश्‍वासन देतात. कमीत कमी ५० टक्के भरण्यास परवानगी देणार का? रोस्टर मंजूर करणार का? हे प्रश्‍न लक्षवेधीद्वारे उपस्थित केले. त्यावर कृषी राज्यमंत्री जयस्वाल यांनी उत्तर दिले ते म्हणाले, की या विद्यापीठात खूप मोठ्या प्रमाणावर जागा रिक्त आहेत.

वित्त विभागाने बिंदू नामावलीनुसार वेगवेगळ्या प्रवर्गानुसार सुधारित आकृतिबंध करण्यास सांगितले आहे. पूर्वीचा २००३ मधील आकृती बंध होता. वीस वर्षांनंतर नवीन आकृतिबंध तयार करण्याची कार्यवाही युद्धपातळीवर सुरू आहे. त्यासाठी दोन ते तीन महिन्यांचा कालावधी अपेक्षित आहे.

एकूण २९७२ पैकी १११८ पदे भरलेली आहेत. तात्पुरत्या स्वरूपात ७९१ पदे कंत्राटी पद्धतीने भरण्यात आली आहेत. त्यामुळे एकूण १९०९ पदे भरलेली आहेत. पुढील तीन महिन्यांत सुधारित आकृतिबंध तयार करुन पद भरतीची कार्यवाही तत्काळ करण्यात यावी, अशा सूचना केल्या आहेत.