Jalna News : खुल्या बाजार शेतमालाचे भाव कोसळल्यानंतर केंद्र शासनाच्या वतीने शेतमालांची हमीभावाने खरेदी करण्यासाठी नाफेडच्या वतीने खरेदी केंद्र सुरू केले जात आहेत. जिल्ह्यात नाफेडचे १२ ठिकाणी खरेदी केंद्र सुरू झाले आहेत. मूग, उडीद, सोयाबीन पिकांची हमीभावाने खरेदी सुरू झाली आहे.

यंदा केंद्र शासनाने मुगाला आठ हजार ६८२, उडीद सात हजार ४०० आणि सोयाबीन चार ८९२ रुपये प्रती क्विंटल हमीभाव जाहीर केला आहे. या तीन पिकांची खरेदी करण्यासाठी केंद्र खरेदी केंद्र सुरू केले आहेत.

यामध्ये अंबड तालुका खरेदी विक्री संघ, जालना कृषी उत्पन्न बाजार समिती येथे जाडाई फार्मर्स प्रोड्यूसर कंपनी, भोकरदन येथे मे. पूर्णा केळणा फार्मर्स प्रोड्यूसर कंपनी, मंठा येथे नानसी शेतकरी धान्य अधिकोष संस्था, माहोरा येथे अॅग्रीटच फार्मर्स प्रोड्यूसर कंपनी, बदनापूर येथे श्री.एकविरा बहुउद्देशीय सेवाभावी संस्था,

परतूर येथे श्री गणेश कृषी उपयोगी साहित्य पुरवठा शेती सह संस्था, वाटूर येथे श्रीराम अंध अपंग औद्यो. उद्योजक सेवा संस्था, जाफराबाद येथे जीवरेखा अॅग्री प्रोड्युसर कंपनी, आन्वा येथे वीर छत्रपती सुशिक्षित बेरोजगार सह संस्था, राजूर येथे वैष्णवी अभिवन सहकारी संस्था आणि आष्टी येथे हर्षवर्धन कृषी विकास प्रोड्यूसर कंपनीकडून हमी भावाने खरेदी सुरू केली आहे.

शेतकऱ्यांनी नोंदणी केल्यानंतर खरेदी केंद्रावर शेतमाला घेऊन जाताना त्याची अद्रता १२ टक्के पेक्षा कमी असावी, याची काळजी घ्यावी.