Buldhana News : सोयाबीन-कापूसप्रश्नी शेतकरी नेते रविकांत तुपकरांनी आक्रमक भूमिका घेत आंदोलनाचे शस्त्र उगारले आहे. सोयाबीन-कापूस दरवाढ, पीकविमा, शेतकऱ्यांची संपूर्ण कर्जमुक्ती, शेतीला मजबूत कंपाउंड यांसह शेतकऱ्यांच्या महत्त्वपूर्ण मागण्यांसंदर्भात सरकारने ३ सप्टेंबरपर्यंत ठोस निर्णय घेतले घ्यावेत.

अन्यथा, ४ सप्टेंबरपासून सिंदखेडराजा येथील माँसाहेब जिजाऊ यांच्या राजवाड्यासमोर बेमुदत अन्नत्याग आंदोलनास करणार असल्याची घोषणा त्यांनी केली.

‘‘सरकार शेतकऱ्यांच्या बाबतीत उदासीन आहे. गेल्या अनेक दिवसांपासून आम्ही आंदोलने करीत आहोत, पण सरकार मात्र बघ्याची भूमिका घेत आहे, त्यामुळे सरकार आमचा शेवटचा अल्टिमेटम आहे.

जर सरकारने ठोस निर्णय घेतले नाहीत, तर ४ सप्टेंबरपासून राज्यातील शेतकरी रस्त्यावर उतरतील,’’ असा इशारा तुपकरांनी दिला आहे.

शनिवारी (३१ ऑगस्ट) तुपकर यांनी भूमिका जाहीर केली. या वेळी डॉ. ज्ञानेश्वर टाले, विनायक सरनाईक, सदाशिव जाधव, अनिल पडोळ, दत्तात्रय जेऊघाले, आकाश माळोदे, राम अंभोरे, अविनाश डुकरे यांच्यासह पदाधिकारी उपस्थित होते.