Crop Damage Issue : रविकांत तुपकरांनी दिला नुकसानग्रस्तांना धीर

Buldhana News : बुलडाणा जिल्ह्यातील खामगाव व शेगाव तालुक्यांत रविवारी (ता. ७) झालेल्या ढगफुटीसदृश पावसामुळे पूर परिस्थिती निर्माण झाली होती.

यामुळे हजारो हेक्टर शेतजमीन खरडून गेल्याने शेती व पिकांचे मोठे नुकसान झाले आहे. अनेकांचे संसार उघड्यावर आले. या नुकसानाची बुधवारी (ता. १०) शेतकरी नेते रविकांत तुपकर यांनी पाहणी केली.

शेगाव तालुक्यातील जवळा बुद्रुक, जवळा पळसखेड व खामगाव तालुक्यांतील कोलारी, पिंप्री गवळी गावांत भेटी देत नुकसानग्रस्तांच्या व्यथा जाणून घेतल्या. नुकसानग्रस्तांना १०० टक्के भरपाई द्या, अन्यथा नुकसानग्रस्तांना घेऊन आक्रमक आंदोलन करू, असा इशारा देखील दिला.

रविवारी संपूर्ण जिल्हाभरात जोरदार पाऊस झाला. विशेषतः घाटाखालील खामगाव आणि शेगाव या दोन तालुक्यांमध्ये ढगफुटी झाल्याने नद्यांना पूर आले. हजारो हेक्टर शेतजमीन पिकांसह खरडून गेली. अनेक गावांमध्ये घरांची पडझड होऊन, घरातील अन्नधान्य व साहित्य वाहून गेले.