Buldana News: पीकविमा आणि नुकसान भरपाईच्या मुद्द्यावर शेतकरी नेते रविकांत तुपकर यांनी मंगळवारी (ता. २८) मुंबई येथे मंत्रालयात मुख्यमंत्री देवेंद्र फडणवीस यांची भेट घेतली.

पीकविम्याबरोबरच मागील वर्षीची राहिलेली नुकसान भरपाई तसेच ठिबक सिंचन अनुदान व शेतकऱ्यांच्या इतर समस्या आणि प्रश्नांबाबत चर्चा करीत हे प्रश्न सोडविण्याची विनंती केली. प्रधान कृषी सचिव विकासचंद्र रस्तोगी यांची देखील भेट घेऊन पीकविमा, भरपाईप्रश्‍नी लक्ष घालण्याची मागणी केली.

बुलडाणा जिल्ह्यासह राज्यातील लाखो शेतकऱ्यांची पीकविम्याची रक्कम तसेच गतवर्षीची नुकसान भरपाईची रक्कम कंपनीकडे रखडली आहे. ही रक्कम शेतकऱ्यांच्या खात्यात जमा व्हावी यासाठी तुपकर सातत्याने पाठपुरावा करीत आहेत.

मुख्यमंत्री देवेंद्र फडणवीस यांची भेट घेऊन त्यांनी पीकविमा, गतवर्षीची राहिलेली नुकसान भरपाई तसेच ठिबक सिंचन अनुदान यासह सोयाबीनचा भाव फरकातील अनुदान, सोयाबीनचे दरवाढ यासह शेतकऱ्यांच्या इतर समस्या मांडल्या.

तुपकर म्हणाले, की बुलडाणा जिल्ह्यात एआयसी पीकविमा कंपनीने गेल्या वर्षीच्या रब्बी हंगामातील कापणी पश्‍चात पात्र असलेल्या व चुकीचे कारण दाखवून अपात्र केलेल्या १ लाख २६ हजार २६९ शेतकऱ्यांना अद्याप पीकविमा परतावा दिला नाही.

त्याचबरोबर खरीप हंगामात चुकीची कारणे देऊन अपात्र केलेल्या ७० हजार ८३१ शेतकऱ्यांना पीकविमा देण्याचे कंपनीने मान्य केले आहे. ‘त्या’ शेतकऱ्यांनाही अद्याप परतावा दिला नाही. जिल्ह्यातील शेतकऱ्यांना २३३ कोटी ८३ लाख रुपये रक्कम मिळणे अद्याप बाकी आहे.

त्यामुळे या शेतकऱ्यांची तसेच राज्यात पीकविम्याची रक्कम बाकी आहे त्या शेतकऱ्यांना तातडीने ती रक्कम मिळावी, यासाठी संबंधित कंपनीला आदेशित करावे, अशी मागणी तुपकर यांनी केली. श्री. रस्तोगी यांचीदेखील भेट घेतली. मुख्यमंत्री आणि कृषीचे प्रधान सचिव यांनी पीकविमा आणि नुकसान भरपाईबाबत आश्वासक शब्द दिल्याचे तुपकर यांनी सांगितले.