Dharashib News : मागील काही दिवसांपूर्वी तुळजापूर तालुक्यातील कामठा परिसरात गेलेला वाघ अखेर येडशी अभयारण्यात परतला आहे. वन विभागाच्या अधिकाऱ्यांनी दिलेल्या माहितीनुसार, वाघाचा मुक्काम येडशी अभयारण्यात जुने रामलिंग मंदिर परिसरात असल्याचे निष्पन्न झाले आहे.

या परिसरात वाघाच्या पायांचे ठसे आढळले आहेत. विशेष म्हणजे, याच भागात बिबट्याचाही वावर असल्याचे स्पष्ट झाले आहे. धाराशिव जिल्ह्यातील घाटंग्री भागात मंगळवारी (ता. २५) रात्री बिबट्याने शेतातील जनावरांवर हल्ला केला.

या हल्ल्यात एका वासराचा मृत्यू झाला, तर गाय गंभीर जखमी झाली आहे. घटनेची माहिती मिळताच वन विभागाच्या अधिकाऱ्यांनी घटनास्थळी भेट देऊन पाहणी केली. या ठिकाणी बिबट्याचे पायांचे ठसे आढळून आले आहेत.

धाराशिव-बार्शी महामार्गावरील हातलाई तलाव परिसरात मंगळवारी सकाळी नागरिकांना बिबट्यासदृश प्राणी आढळून आला. काही तासांतच घाटंग्री भागात जनावरांवर हल्ला झाल्याने या भागात बिबट्याचा सक्रिय वावर असल्याचे दिसून येत आहे.

वाघ आणि बिबट्या या दोन्ही हिंस्र प्राण्यांचा एकाच परिसरात वावर असल्याने शेतकरी आणि पशुपालकांमध्ये भीतीचे वातावरण आहे.