Tomato Rate Sangli : टोमॅटोचे दर अचानक घसरल्याने सांगलीतील टोमॅटो उत्पादक शेतकरी आर्थिक अडचणीत सापडला आहे. फळ लागेपर्यंत केलेला खर्चही निघण्याची शाश्वती नसल्याने बहुतांश शेतकऱ्यांनी टोमॕटोचे प्लॉट सोडून दिले आहेत. कोल्हापूर जिल्ह्यातील शिरोळ तालुक्यातही अशीच काहीशी परिस्थिती पहायला मिळत आहे. शेतात टोमॅटो तोडण्यासाठी आलेल्या मजुरांचा खर्चही निघत नसल्याचे चित्र आहे.

यावर्षी अनुकूल हवामानामुळे कीड व रोगाचा प्रादुर्भाव कमी असल्याने सांगली परिसरातील फळपिके जोमात आहेत. मात्र सध्या टोमॅटोचा दर प्रतिकिलो १० ते १५ रुपयांपर्यंत घसरला आहे.

याबाबत टोमॅटो उत्पादक शेतकरी विजय होणमाने म्हणाले की प्रचंड कष्टातून आणि अवाढव्य आर्थिक गुंतवणूक करून शेतकरी फळभाज्या पिके घेतो. मात्र या पिकांना दर नसल्याने शेतकरी आर्थिक अडचणीत आहे. शासनाने अशा पिकांसंदर्भात शाश्वत धोरण आखणे गरजेचे असल्याचे होणमाने म्हणाले.

टोमॅटो पिकासाठी फळ येईपर्यंत एकरी २ लाख रुपये खर्च होतात. किमान किफायतशिर दर मिळावा अशी अपेक्षा आहे. दर प्रचंड घसरल्याने शेतकऱ्यांच्या अपेक्षांवर पाणी फिरले आहे. तोडणीचा खर्चही भागत नसल्यामुळे शेतकऱ्यांनी टोमॅटो प्लॉट सोडून दिले आहेत.

या पिकांसाठी किमान २० रुपये प्रतिकिलो दराची अपेक्षा फोल ठरल्याने टोमॕटो उत्पादक आर्थिक संकटात सापडले आहे. टोमॅटो दर नसल्याने शेतकऱ्यांचे लाखो रुपयांचे नुकसान झाले आहे. लहरी हवामान, अशाश्वत बाजारभाव याचा फटका पुनश्चः इथल्या शेतकऱ्यांना बसला आहे.