Nanded News : जिल्ह्यात बुधवारी (ता. ६) सकाळी सातच्या दरम्यान कंधार, लोहा, नांदेड या तालुक्यांत पावसाने हजेरी लावली. पावसाचे प्रमाण चांगले असल्यामुळे पिकांना फुले, पाते येण्याच्या काळात पावसाने हजेरी लावल्यामुळे शेतकऱ्यांना दिलासा मिळाला आहे.

मागील चोवीस तासांत जिल्ह्यात सरासरी ३.८० मिलीमीटरची नोंद झाली. नांदेड जिल्ह्यात भारतीय हवामान विभागाने नांदेड जिल्ह्यात पावसाची शक्यता वर्तवली होती. जिल्ह्यात सध्या सोयाबीन पिकाला फुले, पाते लागत आहे.

यासोबतच कपाशीलाही पाते लागत आहेत. या काळात पिकांना पावसाची आवश्यकता होती. या महत्त्वाच्या काळात पिकाला पाण्याची आवश्यकता होती. मागील आठ दिवसांपासून पावसाने पाठ फिरविली होती, आशा काळातच पावसाने हजेरी लावली.

बुधवारी सकाळी झालेला पाऊस नांदेड तालुक्यात सरासरी १५.१० मिलिमीटर, कंधार तालुक्यात सरासरी १३.२० मिलिमीटर, लोहा तालुक्यात सरासरी ९.२० मिलिमीटर पाऊस झाला. योसाबतच हा पाऊस नायगाव, मुखेड, उमरी, भोकर, देगलूर आदी तालुक्यात हलक्या स्वरूपाचा झाला.

बुधवारी सकाळी साडेआठ वाजता संपलेल्या चोवीस तासांत जिल्ह्यात सरासरी ३.८० मिलिमीटर पावसाची नोंद झाली आहे. जिल्ह्याच्या इतर भागात मात्र अद्याप पावसाची प्रतिक्षा आहे. नांदेड जिल्ह्यात आजपर्यंत सरासरी ३५० मिलिमीटरनुसार ३९.६८ टक्के नोंदणी आहे.