Dharashiv News : शेजारच्या शेतकऱ्याने रानडुकरापासून उसाच्या बचावासाठी फडाभोवती लावण्यात आलेल्या वीज प्रवाहित तारेला स्पर्श झाल्याने तरुण शेतकरी गुणवंत बलभीम कागे (वय ३२) यांचा जागीच मृत्यू झाल्याची घटना जेवळी (ता. लोहारा) येथे मंगळवारी (ता. पाच) पहाटे घडली. या घटनेने परिसरात हळहळ व्यक्त होत आहे.
पोलिसांनी दिलेल्या माहितीनुसार, जेवळी शिवारात रानडुकराचा उपद्रव व दहशत वाढल्याने पिकांचे मोठे नुकसान सहन करावे लागत आहे. रानडुकरांना रोखण्यासाठी वन विभागाकडे वारंवार तक्रार करूनही दखल घेतली जात नसल्याने शेतकरीच पिकांचे नुकसान टाळण्यासाठी विविध उपाययोजना करत आहेत.
शेजारच्या शेतकऱ्याने वीज प्रवाहित तारेच्या उपायोजनेत गुणवंत कागे यांचा मृत्यू झाला. या आठवड्यात शिवारात रात्री बारा ते सकाळी आठपर्यंत वीजपुरवठा होत आहे. मंगळवारी पहाटे गुणवंत यांनी उसाला पाणी देण्यासाठी शेतात गेले होते. परंतु शेतात गेल्यानंतर त्यांना वीजपुरवठा खंडित झाल्याचे लक्षात आले.
फ्यूज गेले असेल म्हणून तपासण्यासाठी ते रोहित्राकडे जात होते. मात्र शेजारील शेतकऱ्यांनी डुकरांपासून ऊस शेतीच्या संरक्षणासाठी उसाच्या फडाभोवती तारेचे कुंपण लावून त्यात वीज प्रवाहित केल्याचे त्यांच्या लक्षात आले नाही. दुर्दैवाने त्याच वेळेस खंडित झालेला वीजपुरवठा पुन्हा सुरळीत होता. बांधावरून जाताना कुंपणाच्या तारेला स्पर्श झाल्याने कागे यांचा जागीच मृत्यू झाला.
ही बाब सकाळी नऊ वाजता संबंधित शेतकरी शेतात आल्यानंतर लक्षात आली. मयत शेतकरी गुणवंत कागे हे कष्टाळू होते. त्यांच्या पश्चात आई व दोन भाऊ असा परिवार आहे. दोन वर्षांपूर्वीच मेंढरे चारत असताना अंगावर वीज पडून त्यांच्या वडिलांचा मृत्यू झाला होता. त्यामुळे कुटुंबाची जबाबदारी त्यांच्यावर आली होती.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.