Nanded Rainfall : नांदेडला जुलै महिन्यात ५३ मिलीमीटरची तूट

Nanded News : जिल्ह्यात जूननंतर जुलै महिन्यात पावसाने दिलासा दिला असलातरी आजपर्यंत अपेक्षीत असणाऱ्या पावसाचे प्रमाण ५३ मिलिमीटरने कमी आहे. १ जून ते ३१ जुलै याकालावधीत ३९९.७० मिमी सरासरी पाऊस अपेक्षीत असताना आज रोजीपर्यंत ३४७.१० मिलिमीटर म्हणजेच ८७.०७ टक्के इतकाच पाऊस झाला आहे.

नांदेड जिल्ह्यात एक जून ते ३१ आक्टोबर या पाच महिन्याच्या कालावधीत सरासरी ८९१.३० मिलिमीटर पाऊस पडतो. यंदा जूनमध्ये मृग नक्षत्रात झालेल्या पावसानंतर शेतकऱ्यांनी पेरण्या केल्या. परंतु दुसऱ्या नक्षत्रात मात्र पावसाने दडी मारल्याने पेरण्या लांबल्या होत्या.

जिल्ह्यात जुलै महिन्यात आजरोजी पर्यंत १७ दिवस पावसाचे (सरासरी २.५ मिमी पेक्षा जास्त) ठरले तर १३ दिवस कोरडे गेले. जुलै महिन्यात सरासरी अपेक्षीत पाऊस २४४.३० असताना ३१ जुलैपर्यंत केवळ १९३.१० मिमी म्हणजेच ३१ ऑक्टोबर पर्यंत पडणाऱ्या पावसाच्या ७९ टक्केच पाऊस झाला आहे. ता. एक जून ते ३१ जुलै या कालावधीत ३९९.७० मिमी सरासरी पाऊस अपेक्षीत असताना आज रोजीपर्यंत ३४७.१० मिलिमीटर म्हणजेच ८७.०७ टक्के इतकाच पाऊस झाला आहे.

आज रोजी ५३ मिली मीटर पावसाची तूट आहे. मागील वर्षी आजरोजी पर्यंत सरासरीच्या १३.७९ टक्के अधिक म्हणजे ४५४.८० एवढे पर्जन्यमान नोंदवले होते. जुलै महिन्यात पावसाचा खंड पडला होता. जुलै महिन्यात हदगाव, हिमायतनगर, नांदेड, देगलूर, लोहा व नायगाव या तालुक्यात ७ ते १३ दिवसांचा मोठा खंड पडला होता.

२१ जुलै पासून जिल्ह्यात पावसाला चांगली सुरुवात झाली आहे. असे असलेतरी नांदेड, अर्धापूर, हिमायतनगर, किनवट व मुदखेड तालुक्यांनी आजरोजी पडणाऱ्या पावसाची सरासरी गाठली आहे. उर्वरित १२ तालुक्यामध्ये मोठी तूट दिसून येते. बिलोली तालुक्यात केवळ ६६ टक्केच पाऊस झाला आहे.