Nagpur News : वन्यजीवांच्या अपघातानंतर त्वरित उपचार, बचाव आणि संगोपनासाठी उभारण्यात आलेल्या ट्रान्झिट ट्रीटमेंट सेंटरमध्ये मार्च २०२२ ते नोव्हेंबरपर्यंत २०२३ या कालावधीत २२५० वन्यप्राण्यांसह पक्ष्यांना रेस्क्यू केले आहे. यावरूनच हे केंद्र वन्यप्राण्यांसाठी वरदान ठरत असल्याचे अधोरेखित झाले आहे.

वाढते शहरीकरण, औद्योगीकरण आणि त्यातून होणारा निसर्गाचा ऱ्हास या सर्व गोष्टींचा फटका वन्यप्राण्यांना देखील मोठ्या प्रमाणावर बसतो आहे. मानव-वन्यजीव संघर्षही वाढतो आहे. त्यातून ट्रांझिट ट्रीटमेंट सेंटर ही संकल्पना पुढे आली. भारतात पहिल्यांदा २०१५ साली हे सेंटर नागपुरात अस्तित्वात आले. या संकल्पनेला मूर्त रूप सेमिनरी हिल्स येथे प्राप्त झाले.

या सेंटर मागील मूळ संकल्पना अपघात किंवा अन्य कारणांनी जखमी झालेल्या वन्य प्राण्यांचा बचाव करणे, उपचार करणे आणि त्यांना त्यांच्या नैसर्गिक अधिवासात सुखरूप सोडणे अशी आहे, त्यानुसार ते काम करीत आहे. गेल्या आठ वर्षांत ७७६० वन्यप्राणी आणि पक्षी रेस्क्यू केले. त्यातील ५१४१ प्राणी वाचविण्यास यश आले असून २६१९ वन्यप्राणी उपचारादरम्यान मरण पावले.

वर्ष रेस्क्यू केलेले प्राणी अधिवासात सोडलेले मृत

२०१५-१६ १११ ४१ ७०

२०१६-१७ २९१ १४९ १४२

२०१७-१८ ३८४ १७८ २०६

२०१८-१९ ३५४ १३८ २१६

२०१९-२० ८९० ६२० २७०

२०२०-२०२१ १६६० १०५३ ६०७

२०२१-२०२२ १८२० ११०२ ७००

२०२२-२०२३ २२५० १८६० ३९०