Kolhapur Veterinary Office : राधानगरी तालुक्याच्या पश्चिम परिसरातील ४० वाड्या-वस्त्यांचा पशुसेवेचा आधार असलेल्या धामोड (ता. राधानगरी) येथील श्रेणी दोन पशुवैद्यकीय दवाखान्याच्या इमारतीला गळती लागली आहे. पशुवैद्यकीय अधिकाऱ्यांचा कारभार पाण्यातच सुरू आहे. लोकप्रतिनिधींनी याकडे दुर्लक्ष केल्याने पशुपालकांतून तीव्र नाराजी व्यक्त होत आहे.

धामोडसह लाडवाडी, कुरणेवाडी, जाधववाडी, केळोशी बुद्रुक, आपटाळ, म्हासुर्ली, गवशी, सावतवाडी, जोगमवाडी, भित्तमवाडी, कोनोली, कुपलेवाडी, पखालेवाडीसह ४० वाड्या-वस्त्यांचा समावेश येथील पशुवैद्यकीय दवाखान्यात होतो.

साधारणपणे ६० हजार पशुगण संख्या असून यासाठी एकच पशुवैद्यकीय अधिकारी कार्यरत आहे. भौगोलिकदृष्ट्या विभागलेल्या भागात पशुसेवा करताना पशुवैद्यकीय अधिकाऱ्यांना अनेक अडचणींना सामोरे जावे लागते. वर्षभरापूर्वी शिपाई सुरेश कांबळे निवृत्त झाल्यापासून कर्मचारीपद रिक्तच आहे.

राधानगरी तालुक्याचा पश्चिम भाग तुळशी व धामणी परिसरात विभागला आहे. परिसरातील गावे येथील श्रेणी दोनच्या पशुवैद्यकीय दवाखान्यात समाविष्ट केली आहेत. जनावरांना घटसर्प, लाळखुरकत, फऱ्या यासह अनेक लसीकरण करताना तारेवरची कसरत अधिकाऱ्यांना करावी लागते. कार्यक्षेत्रात जनावरांची संख्या मोठी आहे. येथील मध्यवर्ती ठिकाणी दहा वर्षांपूर्वी बांधलेली पशुवैद्यकीय श्रेणी दोनच्या इमारतीला गळती लागली आहे. दवाखान्याचा कारभार पाण्यातच सुरू आहे. पावसामुळे छत गळत असून बादल्या लावल्या आहेत. त्यामुळे कागदपत्रे, औषधांची काळजी घेणे जिकिरीचे बनले आहे.

लोकप्रतिनिधींचे दुर्लक्ष

याबाबत लोकप्रतिनिधींना नवीन इमारत मंजुरीसाठी ग्रामस्थांनी वारंवार निवेदने दिली. मात्र; लोकप्रतिनिधींनी दुर्लक्ष केले आहे. नव्या इमारतीबाबत कोणताही कार्यवाही झालेली नाही. सध्या येथील कारभार पावसातच सुरू असल्याने पशुपालकांतून तीव्र नाराजी व्यक्त होत आहे.

राधानगरी तालुक्याच्या पश्चिम परिसरातील पशुसेवेचा एकमेव दवाखाना आहे. ४० गावांतील जनावरांना येथून सेवा मिळते. वर्षभरापासून पशुवैद्यकीय दवाखान्याच्या इमारतीला गळती लागल्याने कारभार करणे अवघड बनले आहे. येथे नव्याने पशुवैद्यकीय इमारतीला मंजुरी मिळणे गरजेचे असल्याचे मत धामोडच्या माजी पंचायत समिती सदस्या छाया गुरव व्यक्त केले.

याबाबत धामोडचे पशुवैद्यकीय अधिकारी एस. एन. खटांगळे म्हणाले की परिसरातील ४० वाड्या-वस्त्यांचा पशुसेवेचा कार्यभार असून कर्मचारी पद रिक्त आहे. लसीकरणावेळी तारेवरची कसरत करावी लागते. त्यातच इमारतीला गळती लागली आहे. कागदपत्रे व औषधे महत्त्वाचे असल्याने सांभाळणे जिकिरीचे बनले आहे. वरिष्ठांना याची माहिती कळवली आहे.