Desi Cow Conservation : सेंद्रिय शेती पद्धतीमध्ये देशी गोवंश पालनास महत्त्व

Parbhani News : सेंद्रिय शेती पद्धतीमध्ये देशी गोवंश पालनास अनन्यसाधारण महत्त्व आहे.पशुपालन व दुग्ध व्यवसायातून शेतीतील उत्पन्नाची जोखीम कमी करणे शक्य आहे, असे प्रतिपादन पशुसंवर्धन व दुग्धशास्त्र विभागप्रमुख डॉ. गजेंद्र लोंढे यांनी केले.

वसंतराव नाईक मराठवाडा कृषी विद्यापीठातील संकरित गो पैदास प्रकल्प येथे मंगळवारी (ता. २२) शुद्ध देशी गोवंश जतन आणि संवर्धन दिन साजरा करण्यात आला. या वेळी डॉ. लोंढे बोलत होते. कुलगुरू डॉ. इंद्रमणी मिश्रा, संशोधन संचालक डॉ. खिजर बेग यांच्या मार्गदर्शनात आयोजित या कार्यक्रमात प्रारंभी गो पूजन करण्यात आले.

या वेळी पशुविज्ञान शास्त्रज्ञ डॉ. एस. एस. देशमुख, सहयोगी प्राध्यापक डॉ. डी. व्ही. बैनवाड, डॉ. पी. व्ही. पडघन, डॉ. नरेंद्र कांबळे, जी. पी. भोसले, सृष्टी भिंगारडे, रवी काळे, महेंद्र कचरे, माणिक शिंदे आदी उपस्थित होते.

देशी गोवंशाचे संवर्धन व देशी गाईच्या संकरीकरणातून दुग्धोत्पादनात वाढ करणे या उद्देशाने वसंतराव नाईक मराठवाडा कृषी विद्यापीठात परभणी येथे १९७५ मध्ये संकरित गो पैदास प्रकल्प स्थापन करण्यात आला.

मराठवाड्यातील देवणी प्रजाती दुग्धोत्पादन व शेतीकाम अशी दुहेरी उपयोगाची आहे.याप्रकल्पाच्या ठिकाणी सध्या देवणी व होल्स्टिन फ्रिजियन (होलदेव) प्रजातीचे १७० पशुधन आहे.