Solapur News : सोलापूर जिल्ह्याची वरदायिनी असणाऱ्या उजनी धरणातील पाणीपातळी रविवारी (ता. २१) सायंकाळी उणेमध्ये पोचली आहे. यंदा कमी पाऊसमानामुळे धरणातील पाणीसाठा केवळ ६६ टक्क्यांपर्यंत झाला होता.

पण गेल्या पाच-सहा महिन्यांपासून नदी, कालव्यासह विविध योजनांसाठी वापरलेल्या पाण्यामुळे हळूहळू पाणीसाठा कमी होत हा साठा उणेपातळीत पोचला आहे. गेल्या दहा वर्षात पहिल्यांदाच जानेवारी महिन्यातच धरण उणेमध्ये गेले आहे. सोलापूर जिल्ह्यातील सर्वच एमआयडीसींना तर पुणे जिल्ह्यातील काही एमआयडीसींना उजनीतूनच पाणीपुरवठा होतो.

कर्जत- जामखेड, धाराशिव, सोलापूर, इंदापूर, बारामती शहरासह सोलापूर जिल्ह्यातील १००हून अधिक ग्रामपंचायती व नगरपालिकांचा पाणीपुरवठा उजनीवरच अवलंबून आहे. सोलापूर जिल्ह्यातील जवळपास पावणेदोन लाख हेक्टर जमीन उजनीमुळे सिंचनाखाली आली आहे.

त्यामुळे उजनी धरणातील पाण्याला मोठे महत्त्व आहे. पण यंदा कमी पाऊसमानामुळे धरणातील पाणीसाठा जेमतेम ६६ टक्क्यांपर्यंत झाला. या आधी शेतीसाठी पहिली पाणीपाळी सोडण्यात आली. आता गेल्याच आठवड्यात पुन्हा दुसरी पाणीपातळीही सोडण्यात आली, आता धरणातील संपूर्ण पाणी केवळ पिण्यासाठीच राखीव ठेवले जाणार असल्याचे सांगण्यात आले.

धरणातील पाणीसाठा उणे ०.३९ टक्के

सोमवारी (ता.२२) धरणातील एकूण पाणी पातळी ४९१ मीटर इतकी राहिली असून, धरणातील एकूण पाणीसाठा ६३.४५ टीएमसी आणि त्यापैकी उपयुक्त पाणीसाठा उणे ०.२१ टीएमसी एवढा आहे. तर या पाण्याची टक्केवारी उणे ०.३९ टक्के इतका आहे.