Pune News : पुणे आणि सोलापूर जिल्ह्यासाठी वरदायनी ठरलेल्या उजनी धरणाची यंदा अतिशय बिकट अवस्था झाली आहे. कमी पाऊसमान आणि ढिसाळ नियोजनामुळे पाणीसाठ्याची स्थिती चिंताजनक पातळीवर आली आहे.
सध्या धरणातील पाणीसाठा अवघ्या ९ टक्क्यांवर आला आहे. त्यातच येत्या सहा महिन्यांत नदी, कालवा, पाणी योजनांव्दारे तीन आवर्तने सोलापूर जिल्ह्याला देणे निश्चित करण्यात आले आहे. त्यामुळे यंदा उन्हाळ्यापूर्वीच धरण कोरडे पडण्याची शक्यता आहे.
सध्या उजनी धरणातून सोलापूर महापालिकेसह , पंढरपूर, सांगोला आणि मंगळवेढा नगरपालिकेला पिण्यासाठी ५ हजार क्युसेक विसर्गाने पाणी सोडण्यात येत आहे. सध्याची धरणातील पाणीसाठ्याची स्थिती पाहता येणाऱ्या काळात पाणी टंचाईचे संकट गडद होण्याची चिन्हे आहे.
गेल्यावर्षी जानेवारी महिन्यात १०० टक्के पाणीसाठा असलेल्या धरणात यंदा केवळ ९ टक्के उपयुक्त पाणीसाठा आहे. सोलापूरसाठी धरणातून ५ टीएमसी पाणी सोडावे लागते. हे पाणी सोलापूरकरांना केवळ ५० दिवस पुरणार आहे. याशिवाय मार्च आणि मे महिन्यातही दोन आवर्तानाच्या माध्यमातून १० ते १२ टीएमसी पाणी सोडावे लागणार आहे.
हवामान विभागाने वर्तविलेल्या अंदाजानुसार यंदा एल निनो किंवा सुपर एल निनोचा फटका बसल्यास जुलै महिन्यातही पाण्याची गरज भागविण्यासाठी आवर्तन सोडावे लागणार आहे. त्यामुळे आगामी काळात धरणाच्या मृत साठ्यातून पाणी सोडण्याची वेळ येणार आहे.
रब्बीसाठी पाणी सोडण्याची मागणी
दरम्यान, आधीच खरीप हंगाम हातातून गेल्यामुळे शेतकऱ्यांची सर्व भीस्त रब्बी हंगामावर आहे. यंदा कमी पाऊसमानामुळे उजनीतील पाणीसाठ्याची स्थिती बिकट झाली आहे. अशातच आता रब्बीसाठी धरणातून दुसरे आवर्तन सोडण्याची मागणी शेतकरी करत आहेत.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.