Jalgaon News : जळगाव जिल्ह्यात यावल, जामनेर, रावेर तालुक्यात केळीसह अन्य भाजीपाला पिकांसाठी शेतकरी पॉली मल्चिंगचा अधिकचा उपयोग करीत आहेत. यातून उत्पादन वाढीसह पाण्याची कटकसर करण्यास बळ मिळत असल्याचे शेतकऱ्यांचे म्हणणे आहे.

मल्चिंग पेपर व ठिबक सिंचन वापरल्यामुळे शेतकऱ्यांना कमी पाण्यामध्ये चांगले उत्पन्न मिळत आहे. त्याचबरोबर पिकांच्या सोबतीने वाढणाऱ्या तणावरदेखील नियंत्रण राखता येत आहे. त्यामुळे तण काढणीवर होणारा शेतकऱ्यांचा खर्च यामुळे वाचत आहे. पेपरच्या आच्छादनामुळे तापमान आणि आर्द्रता नियंत्रित होत असल्याने पीकवाढीला फायदा होत आहे.

त्याचबरोबर किडीचा प्रादुर्भाव होण्यापासून पिकाला वाचविता येत आहे. अतिरिक्त पाऊस झाला तरी त्याचा फारसा परिणाम उत्पादनावर होत नसल्यामुळे मल्चिंगचा वापर अधिक प्रमाणात परिसरातील शेतकरी करू लागले आहेत.

मल्चिंग पेपर आच्छादनासाठी साधारणता ३० ते ३२ हजार रुपये हेक्टरी खर्च येतो. यासाठी शासनाची अनुदान योजनादेखील उपलब्ध आहे. या योजनेतून शेतकऱ्यांना १६ हजार रुपयांपर्यंत हेक्टरी अनुदान मिळते. या योजनेला प्राप्त करून घेण्यासाठी कृषी विभागाशी संपर्क करावा लागतो. त्यामुळे या योजनेत अनेक शेतकरी सहभागीदेखील आहेत.

रोपे लागवडीसही पसंती

मल्चिंग पेपरबरोबरच शेतकरी मिरची, कलिंगड, टोमॅटो आदींच्या रोपांवर भर देत आहेत. आधी बियाणे जमिनीत रोवून त्या बियाण्यांच्या माध्यमातून पिकांची उगवण केली जात होती; परंतु आता शेतकरी तयार रोपांची लागवड करत असल्याने पिकांचा कालावधी काहीअंशी कमी होत आहे.

रोपांच्या लागवडीतून पिकाची निगा राखणे शेतकऱ्यांना सोपे जात आहे. रोपलागवडीतून मररोगावर नियंत्रण राखता येत आहे. त्याचबरोबर योग्य खते, तसेच विविध कीटकनाशके तसेच पोषक द्रव्यांचा वापर करून अधिक उत्पन्न मिळविता येते आहे. एकंदरीत परिसरातील शेतकरी आधुनिक शेतीकडे वळत आहे.