Alandi News: यंदाच्या आषाढी वारीदरम्यान देखील राज्य सरकार वारकऱ्यांना कुठल्याही प्रकारची कमतरता भासू देणार नाही. सन २०२३ व २४ दरम्यान मृत्यू झालेल्या वारकऱ्यांच्या परिवारांना येणाऱ्या आषाढीच्या पूर्वी अत्यंत आदराने प्रत्येकी ५ लक्ष रुपयांचा निधी सुपूर्द केला जाईल असे आश्वासन उपमुख्यमंत्री एकनाथ शिंदे यांनी दिल्याची माहिती शिवसेना आध्यात्मिक आघाडीचे अध्यक्ष अक्षय महाराज भोसले यांनी दिली.

याबाबत अधिक माहिती देताना अक्षय महाराज भोसले यांनी सांगितले संत ज्ञानेश्वर माउलींच्या ७५० वा जन्मोत्सव सोहळ्यानिमित्त उपमुख्यमंत्री एकनाथ शिंदे शुक्रवारी (ता.९)आळंदीत आले होते. या वेळी आळंदी येथे सर्व मानाच्या पालखींचे प्रमुख व विश्वस्त यांच्यावतीने उपमुख्यमंत्री एकनाथ शिंदे यांची भेट घेण्यात आली.

या वेळी वर्षभरापूर्वीच्या आषाढी वारी पालखी सोहळ्यात उपमुख्यमंत्री एकनाथ शिंदे यांनी राज्य सरकारच्या माध्यमातून अत्यंत सुयोग्य आणि चांगल्या सुविधा पुरविल्याबद्दल आळंदीत विविध संतांच्या मानाच्या पालखी प्रमुखांनी उपमुख्यमंत्री एकनाथ शिंदे यांचा विठ्ठलाची मूर्ती भेट देऊ केली. मानाची पालखी प्रमुख व विश्वस्त यांच्याकडून उपमुख्यमंत्री शिंदे यांनी निवेदन स्वीकारत तत्काळ योग्य ती कार्यवाही करण्याबाबत अभिवचन दिले.

ते म्हणाले, की आपल्या सर्व समस्या तथा सकल संतांच्या तीर्थस्थानांसाठी मंदिरासाठी आवश्यक ती सर्व मदत केली जाईल. गत वर्षीप्रमाणे यंदाही सर्व पालखी सोहळ्यांच्या सुयोग्य समन्व्यासाठी उपमुख्यमंत्री शिंदे यांच्याकडून अक्षय महाराज भोसले यांच्याकडे जबाबदारी देण्यात आली आहे. मागील वर्ष प्रत्येक दिंडीस देण्यात आलेल्या २० हजार निधीचा वारकरी दिंड्यांना खूप मोठा फायदा झाला, असा गौरवपूर्ण उल्लेख देखील सर्व पालख्यांचे प्रमुख व विश्वस्तांनी या वेळी केला.

पंढरपूर येथील संत नामदेव महाराज, नाशिक येथील संत निवृत्तिनाथ महाराज, आळंदी येथील संत ज्ञानेश्वर महाराज, सासवड येथील संत सोपान काका, मुक्ताईनगर येथील संत मुक्ताई महाराज, पैठण येथील संत एकनाथ महाराज, देहू येथील संत तुकाराम महाराज असे मानाच्या पालखी सोहळा प्रमुखांसह संत वंशज, ज्येष्ठ कीर्तनकार उपस्थित असल्याची माहिती भोसले महाराजांनी दिली.