Pune News : दरवर्षी वेळेत सुरू होणारे साखर कारखाने चालू वर्षी उशिराने सुरू होत आहे. त्यामुळे शेतकरी आणि ऊसतोड मजुरांसाठी मनस्ताप सहन करणारा ठरणार आहे. समाधानकारक पाऊस होऊनही पुणे जिल्ह्यातील शेतकऱ्यांना गहू आणि हरभरा पीक घेता येणार नसल्याने शेतकऱ्यांच्या पुढील अडचणी वाढत आहेत. त्यामुळे रब्बी हंगाम वाया जाणार असल्याची भीती शेतकऱ्यांना आहे.

यंदा १५ नोव्हेंबरच्या दरम्यान कारखाने सुरू झाले असले तरी प्रत्यक्षात पुणे जिल्ह्यात अजूनही साखर कारखाने फारसे सुरू झालेले नाही. त्यामुळे ऊस उत्पादक शेतकरी मात्र ऊस तुटून जाण्याच्या प्रतीक्षेत आहे. हातावर पोट असणारा ऊस तोडणी कामगार कारखान्याकडे येण्याची तयारी करीत आहे.

साधारणपणे दरवर्षी एक नोव्हेंबर रोजी राज्यातील साखर हंगाम सुरू होत असतो. दहा नोव्हेंबरपर्यंत हंगाम सुरळीत सुरू होतो. मात्र, यावर्षी अचानक मंत्री समितीने साखर हंगामाची तारीख पुढे ढकलली आहे. त्यात विधानसभा निवडणुकीमुळे ऊसतोडणी कामगारांनी गाव सोडलेले नाही. आता निवडणूक झाल्याने ऊसतोडणी कामगार कारखान्यांवर दाखल होण्याची चिन्हे आहेत.

त्यामुळे कारखाने सुरळीत सुरू होण्यासाठी दहा डिसेंबर उजाडणार आहे. यावर्षी पावसाचे प्रमाण चांगले असल्याने उसाची वाढ चांगली झाली आहे. बारा ते तेरा महिने होऊनही ऊस शेतात उभा आहे. गेल्या वर्षी नोव्हेंबर महिन्यात कारखान्यांचे एक लाख टनाच्या वर गाळप झाले होते. मात्र, अजून एक महिना उसाला तोडी येत नसल्याने उसाचे वजन घटून ऊस उत्पादकांचे नुकसान होणार आहे.

दुसरीकडे ३० टक्के ऊस उत्पादक शेतकरी उसाचे पीक गेल्यानंतर त्याच शेतात गहू व हरभऱ्यासारखी पिके घेत असतो. जिल्ह्यातील काही साखर कारखान्याच्या कार्यक्षेत्रात काही ऊसतोड कामगारांच्या टोळ्या गेल्याच आठवड्यातच दाखल झाल्या आहेत. मात्र, प्रत्यक्षात ऊस तोडणीसाठी त्यांना कारखाने सुरू होण्याची प्रतीक्षा आहे.

उशिरा ऊस तोडणीचा रब्बीला फटका

यंदा १५ नोव्हेंबरपूर्वी ऊसतोड मजूर कारखान्यावर न आल्याने कारखान्यांनी करारबद्ध केलेले वाहतूकदार आणि मुकादम हेही अडचणीत येत आहेत. वाहतूकदारांनी लाखो रुपये उचल मजुरांना दिली आहे. मजूर कारखान्यावर पोहोचले नाही किंवा पळवापळवी झाली तर कोट्यवधी रुपयांचे नुकसान होणार आहे. येत्या काळात साखर कारखाने सुरू झाले तरी शेतकऱ्यांना गहू, हरभरा अशा पिकांच्या पेरण्या करणे शक्य होणार नसल्याचे चित्र आहे.