Rabi Sowing : रब्बी पेरणीला वेग, हरभऱ्याची लागवड जोरात

Akola News : रब्बी हंगामातील पिकांना जिल्‍‍ह्यात वेग आला असून आजवर हरभऱ्याची सर्वाधिक ३५ हजार हेक्टरपेक्षा अधिक लागवड झाली आहे. तर जिल्ह्यात आतापर्यंत विविध पिके मिळून ४१ हजार हेक्टरपर्यंत लागवड पोचली आहे. सरासरीच्या ३५ टक्क्यांपर्यंत ही लागवड झालेली आहे.

रब्बी हंगामातील गहू, हरभरा या पिकांच्या लागवडीला जिल्ह्यात सध्या सर्वत्र वेग आला. रब्बीत हरभऱ्याची लागवड सर्वाधिक क्षेत्रावर होत असते. जिल्ह्यात हरभऱ्याचे सरासरी क्षेत्र एक लाख हेक्टरवर आहे. यंदा परतीचा पाऊस चांगला झाला. जमिनीत अद्यापही ओल आहे.

शिवाय प्रकल्प तुडूंब भरलेले असल्याने सिंचनासाठी पाण्याची व्यवस्थासुद्धा आहे. यामुळे रब्बीत हरभऱ्याची लागवड या सरासरीपेक्षा अधिक होईल असा अंदाज आहे. गव्हाचेही १९ हजार २४० हेक्टर हे सरासरी क्षेत्र आहे. खारपाण पट्ट्यात कालव्याच्या सिंचनावर आधारित गहू लागवड दर वर्षी वाढत आहे.

येत्या काळात गव्हाची पेरणी होऊ शकते. आजवर १९२४० हेक्टरपैकी ४५४० हेक्टर म्हणजेच सरासरीच्या २५ टक्क्यांपर्यंत लागवड झालेली आहे. अकोल्यात रब्बी ज्वारीचे क्षेत्र मागील काही हंगामात विस्तारत चालले आहे. सरासरी ९११ हेक्टरच्या तुलनेत दरवेळी अधिक क्षेत्रावर पेरणी होत आलेली आहे.

यंदा आतापर्यंत तीनशे हेक्टरपेक्षा अधिक क्षेत्र रब्बी ज्वारीच्या लागवडीखाली आलेले आहे. मक्याची लागवड जिल्ह्यात तुलनेने कमी राहते. आजवर ३० हेक्टर मका क्षेत्रावर पेरणी आटोपली. करडईचे २६३ हेक्टर सरासरी क्षेत्र असून आतापर्यंत पाच हेक्टरवर पेरणी आटोपली आहे.

 बाजारात हरभऱ्याच्या ९२१८ वाणाची चलती

बाजारपेठेत आढावा घेतला असता शेतकऱ्यांकडून हरभऱ्याच्या ९२१८ या वाणाचीच अधिकाधिक मागणी होत आहे. या भागात हा वाण पोषक बनलेला आहे. बाजारात विविध प्रकारचे पर्यायी वाण उपलब्ध असले तरी सर्वाधिक विक्री जॅकी ९२१८ वाणाचीच होत असल्याचे विक्रेत्यांकडून सांगण्यात आले.