Pune News : राज्यातील शेतकऱ्यांना प्रतीक्षा असलेल्या ‘नमो शेतकरी महासन्मान योजने’चा सहावा हप्ता दोन दिवसांत मिळणार आहे. त्यासाठी दोन हजार कोटींहून अधिक रक्कम शेतकऱ्यांच्या बॅंक खात्यात वर्ग करण्यास सुरुवात झाली आहे.

शेतकऱ्यांना अलीकडेच पंतप्रधान किसान सन्मान निधी योजनेचा डिसेंबर २०२४ ते मार्च २०२५ या टप्प्याचा १९ वा हप्ता मिळाला होता. परंतु याच योजनेतील पात्र शेतकऱ्यांना राज्याकडून ‘नमो’चा हप्ता दिला जातो. त्यानुसार पाच हप्ते मिळाले होते; परंतु सहावा अद्याप मिळालेला नव्हता.

‘‘राज्यातील ९३ लाख २६ हजार शेतकऱ्यांना ‘नमो’चा सहावा हप्ता वाटण्याचे नियोजन पूर्ण झाले आहे. राज्याच्या तिजोरीतून दोन हजार १६९ कोटी रुपये आता थेट शेतकऱ्यांच्या आधार संलग्न बॅंक खात्यात जमा होतील. बहुतेक ठिकाणी ३१ मार्चअखेर शेतकऱ्यांना पैसे प्राप्त झालेले असतील,’’ अशी माहिती कृषी आयुक्तालयाच्या वरिष्ठ सूत्रांनी दिली.

राज्यातील पात्र शेतकरी कुटुंबाला (पती, पत्नी व त्याची १८ वर्षांखालील अपत्ये) यांना वार्षिक सहा हजार रुपये देण्याची तरतूद ‘नमो शेतकरी महासन्मान योजने’त आहे. प्रतिहप्ता दोन हजार रुपये याप्रमाणे तीन हप्त्यात ही रक्कम देण्याचे राज्याने घोषित केले होते.

‘पीएम किसान’मधून मिळणाऱ्या सहा हजारांच्या मदतीत भर घालणारी ही योजना राज्याने चालू केल्यामुळे शेतकऱ्यांच्या बॅंक खात्यात दोन्ही योजना मिळून वार्षिक बारा हजार रुपये मदत जमा होत आहे. ‘नमो’ योजनेतून आतापर्यंत ९० लाख ८६ हजार शेतकऱ्यांना राज्याने आठ हजार ९६१ कोटी रुपये वाटले आहेत.