Sangli News : सांगली जिल्ह्यात दुसऱ्या दिवशी पावसाची उघडीप असून वारणा धरण क्षेत्रातही पावसाचा जोर कमी झाला आहे. त्यामुळे वारणा धरणातून पाण्याचा विसर्ग कमी केला आहे. कृष्णा आणि वारणा नदीच्या पाण्याची पातळी कमी होऊ लागली असल्याने सांगली जिल्ह्यातील पूरपट्ट्यातील लोकांना दिलासा मिळाला आहे.

जिल्ह्यात तीन दिवसांपासून पावसाचा जोर कमी झाला होता. गेल्या दोन दिवसांत पावसाने उघडीप दिली आहे. तसेच वारणा धरण पाणलोट क्षेत्रात पावसाचा जोर कमी झाला आहे. त्यामुळे धरणात पाण्याची आवक मंदावली असल्याने धरणातून सोमवारी (ता. २९) सकाळी साडेदहानंतर पाण्याचा विसर्ग कमी करण्यात आला.

धरणातून वक्रद्वारातून १०८८५ तर विद्युत गृहातून १४०० असा एकूण १२२८५ क्युसेकने विसर्ग सुरू केला आहे. वारणा धरण पाणलोट परिसरात २४ तासांत ७० मिलिमीटर पावसाची नोंद झाली.

कोयना धरण पाणलोट क्षेत्रातही पावसाचा जोर ओसरलेला आहे, परंतु धरणातील आवक अजूनही ३८०१४ हजार क्युसेक असल्यामुळे ३२ हजार १०० क्युसेक विसर्ग नदीत केला जात आहे. कोयना धरणातून पाण्याचा विसर्ग स्थिर आहे. परिणामी, नदीच्या पाणी पातळीतील उतार हा संथ गतीनेच होत आहे. परंतु काही भागांत पाऊस सुरू असल्याने कऱ्हाड भागातील कोयना पूल, कृष्णा पुलाजवळ पाण्याच्या पातळी संथगतीने वाढत असल्याचे चित्र आहे.

सांगली येथील आयर्विन पुलाजवळील पाणीपातळी कमी होऊ लागली आहे. सोमवारी (ता. २९) आयर्विन पुलाजवळ दुपारी बाराच्या सुमारास ३८ फूट ११ इंच पातळी होती. नदीच्या पाण्याची पातळी संथगतीने कमी होत असल्याने कृष्णा आणि वारणा नदी काठच्या पूरपट्ट्यातील लोकांना दिसाला मिळाला आहे.