Shikrapur News: केंदूरच्या प्राथमिक आरोग्य केंद्रावर अवलंबून असणाऱ्या ८ गावांतील रुग्णांना सोमवारी (ता.२८) आरोग्य अधिकाऱ्यांविना ताटकळत उभे राहावे लागले होते. परिणामी मोठ्या संख्येने रुग्णांची संख्या वाढल्याने गर्दीमुळे आरोग्य सुविधा कोलमडली होती.

केंदूरचा (ता.शिरूर) सोमवारी आठवडे बाजार असतो. यानिमित्ताने विविध गावांतील शेतकरी, रूग्ण गावात येत असतात. आज (ता.२८) परिसरातील ८ गावे आणि वाड्या-वस्‍त्यांवरील शेतकरी, कुटुंबीय उपचारांसाठी आले होते. यामध्ये सुमारे २० ते २२ महिला कुटुंब नियोजन शस्त्रक्रियेसाठी आल्या होत्‍या.

तर ४० ते ५० रुग्ण बाह्यरुग्ण तपासणीसाठी ताटकळत होते. याचा अनुभव सरपंच प्रमोद पऱ्हाड यांना आला. पुणे जिल्हा परिषदेकडून होत असलेली ही आरोग्याची हेळसांड गंभीर असून याबाबत संबंधित सर्व अधिकारी-कर्मचाऱ्यांवर कारवाई करण्याची मागणी केली असून निवासी डॉक्टर तत्काळ न दिल्यास आंदोलनाचा इशाराही त्यांनी दिला.

सरपंच प्रमोद पऱ्हाड यांनी सोमवारी सकाळी १० वाजता आरोग्य केंद्रात भेट दिली असता, २० ते २२ महिला कुटुंब नियोजनाच्या शस्त्रक्रियेसाठी आल्या होत्या. तर, सुमारे ५० रुग्ण बाह्यरुग्ण तपासणीसाठी उभे होते. या वेळी औषधे देणारा कर्मचारीही गायब होता. याबाबत तालुका वैद्यकीय अधिकारी डॉ. राजेश कट्टीमणी यांनी बेजबाबदारपणे उत्तरे दिल्याने ग्रामस्थांचा संताप वाढला. याही स्थितीत एका वैद्यकीय अधिकारी नसलेल्या व्यक्तीकडून तपासणी करण्याचा गंभीर प्रकार केला गेल्याचेही श्री. पऱ्हाड यांनी सांगितले.

दोन डॉक्टरांना तत्काळ कारणे दाखवा नोटीस

सरपंच पऱ्हाड यांनी याबाबतचे गांभीर्य तालुका आरोग्य अधिकारी डॉ. राजेश कट्टीमणी यांना सांगितले. यावर डॉ. कट्टीमणी यांनी तत्काळ डॉ. गजानन बावसकर व डॉ. रामदास चेपाटे या दोघांनाही कारणे दाखवा नोटीस बजावलेली असून तसा अहवाल मी वरिष्ठ कार्यालयाला पाठवीत असल्याचे सांगितले.