Eknath Shinde : उपमुख्यमंत्री एकनाथ शिंदेंकडून नवा वैद्यकीय कक्ष; मुख्यमंत्री फडणवीस टक्कर देणार का?

DCM Eknath Shinde : राज्याचे उपमुख्यमंत्री एकनाथ शिंदे आणि मुख्यमंत्री देवेंद्र फडणवीस यांच्यामध्ये शित युद्ध सुरू असल्याचे पहायला मिळत आहे. मुख्यमंत्री वैद्यकीय सहायता केंद्र असताना, उपमुख्यमंत्री एकनाथ शिंदे यांच्या स्वहस्ते येत्या ४ मार्च रोजी उपमुख्यमंत्री सहाय्यक वैद्यकीय कक्षाचे उद्घाटन होणार आहे. उपमुख्यमंत्री शिंदे यांच्या निर्णयानंतर राज्यात २ वैद्यकीय कक्ष सुरू होणार आहेत. यामुळे मुख्यमंत्र्यांच्या वैद्यकीय मदत कक्षाला उपमुख्यमंत्री शिंदे यांचा नवा वैद्यकीय विभाग टक्कर देणार का? अशा चर्चा रंगू लागल्या आहेत. यावर मंगळवार(ता.१८) मंत्रिमंडळ बैठक झाल्यानंतर देवेंद्र फडणवीस यांनी माध्यमांशी याबाबत संवाद साधला.

मुख्यमंत्री देवेंद्र फडणवीस आक्रमक होत म्हणाले, "उपमुख्यमंत्र्यांनी वैद्यकीय कक्ष सुरू केला असेल तर यात काही गैर काय आहे. मी देखील उपमुख्यमंत्री असताना एक वैद्यकीय कक्ष चालवायचो. वैद्यकीय कक्ष आपण यासाठी चालवतो की, त्यातून काही समन्वय साधता आला पाहिजे. मुख्यमंत्री असतील, उपमुख्यमंत्री असतील, यांच्याकडे प्रकरणे येत असतात. त्यामुळे उपमुख्यमंत्र्यांनी वैद्यकीय कक्ष सुरू केला असेल तर काही चुकीचे काही नाही", असे मुख्यमंत्री फडणवीस म्हणाले.

एकनाथ शिंदे यांचं स्पष्टीकरण

"आम्ही महायुती सरकार म्हणून काम करत आहे. माझ्याकडे ३१ ऑक्टोबर २०२३ चा जीआर आहे. मी मुख्यमंत्री असतानाच हा वैद्यकीय कक्ष सुरु झाला. आता यातून जे अर्ज येतील, मुख्यमंत्री सहाय्यता निधीमध्ये ते फॉरवर्ड केले जातील. तिथे रामेश्वर नाईक आहेत. मंगेश चिवटे आमच्या शिवसेना वैद्यकीय कक्षाचे जे प्रमुख आहेत. मुख्यमंत्री सहाय्यता कक्षात ते काम करत होते. त्यावेळीही रामेश्वर नाईक उपमुख्यमंत्री वैद्यकीय कक्षात काम करत होते. त्यामुळे लोकांना जलद वैद्यकीय सेवा देण्यासाठी आम्ही मदत करु, असं एकनाथ शिंदे म्हणाले.

"मी, देवेंद्र फडणवीस, अजित पवार एकत्र बसतो आणि नवीन प्रकल्पांना चालना देतो. समन्वय कक्ष हा शिवसेनेचे जे मंत्री आहेत, त्यांच्या खात्यांचा आढावा घेतला जाईल". असे एकनाथ शिंदेंनी स्पष्ट केलं.