Waqf Institutions Roha News : वक्फ धार्मिक स्थळे आणि संस्था विश्वस्तांना आता वक्फ मंडळाला आता वार्षिक अर्थसंकल्प द्यावा लागणार आहे. त्यानुसार कोकणातील तीन हजार संस्थांना नोटिसा पाठवल्या आहे. नोटीस मिळाल्यापासून ३० दिवसांत अर्थसंकल्प सादर करण्याच्या सूचना आहेत.

याशिवाय वक्फ मिळकती भाडे तत्त्वावर देण्यासंदर्भातील नियमावलीही वक्फ मंडळाकडून तयार केली आहे. याबाबतचे पत्र आणि नोटीस वक्फ धार्मिक स्थळे आणि संस्था विश्वास्तांना पाठवण्यात आल्या.

राज्यातील मशीद, मदरसा, दरगाह या वक्फ धार्मिक संस्थांच्या देखभाल व व्यवस्थापनासाठी केंद्र सरकारने १९९५ मध्ये महाराष्ट्र वक्फ ऑफ बोर्डची स्थापना केली. त्‍या अनुषंगाने संस्थेच्या मशीद, मदरसा, दरगाह यांची नोंद छत्रपती संभाजीनगर येथील मुख्य वक्फ ऑफ बोर्ड या कार्यालयात करणे गरजेचे आहे.

पूर्वी जिल्ह्यातील अलिबाग येथील धर्मादाय आयुक्त कार्यालयात यासंदर्भातील कामकाज चालायचे. आता छत्रपती संभाजीनगर येथे स्वतंत्र कार्यालय सुरू करण्यात आले आहे. आता याच वक्फ बोर्डाला धार्मिक स्थळे आणि संस्था विश्वस्तांना अर्थसंकल्प सादर करावा लागणार आहे.

कोकणातील तीन हजार संस्थांना नोटिसा पाठवल्या. धार्मिक स्थळासह अन्य वक्फ संस्थांना वर्षभरातील कामे, सर्व प्रकारच्या खर्चासंदर्भात नियोजन करावे लागणार आहे.