Parbhani News : अतिवृष्टीमुळे नदी, नाले व ओढ्याकाठच्या जमिनीवरील पिकांचे मोठे नुकसान झाले असून या जमिनीवरील पीक नुकसानीचे सँपल सर्वे रद्द करावेत. तसेच सर्व बाधित शेतकऱ्यांना आठ दिवसांच्या आत पीकविमा भरपाई देण्यात यावी या मागण्यांसाठी स्वाभिमानी शेतकरी संघटनेतर्फे गुरुवारी (ता.१२) जिल्हाधिकारी कार्यालयात चटणी भाकर खाऊन आंदोलन करण्यात आले.

परभणी जिल्ह्यात मागील आठवड्यात झालेल्या अतिवृष्टीमुळे नदी, नाले, ओढ्याकाठच्या शेतजमिनी खरवडून गेल्या आहेत. खरीप हंगामातील पिकांपासून शेतकऱ्यांच्या हाती काहीच लागणार नाही.

त्यामुळे सँपल सर्वे न करता विमा कंपनीने विमा संरक्षित रक्कम आठ दिवसांच्या आत शेतकऱ्यांच्या खात्यावर जमा करावी. अतिवृष्टीमुळे पिकांच्या उत्पादनात ५० टक्क्यांहून अधिक घट येणार आहे.

त्यामुळे मध्यम हंगाम प्रतिकूल स्थिती अंतर्गत उभ्या पिकांचे सर्वे करून शेतकऱ्यांना २५ टक्के अग्रिम आठ दिवसांच्या आत अदा करावा, या मागण्यांसाठी स्वाभिमानी शेतकरी संघटनेचे जिल्हाध्यक्ष किशोर ढगे यांच्या नेतृत्वात जिल्हाधिकारी कार्यालयात चटणी भाकर खाऊन आंदोलन करण्यात आले.