Sugarcane Season : जुलैनंतर हंगाम २०२५/२६ मध्ये ऊस पीक कर्ज दरात वाढ होणार आहे. हेक्टरी ५ टक्के वाढीचा निर्णय जिल्हास्तरीय पीक कर्ज कमिटीने निश्चित केला असून याबाबत शासनाला प्रस्ताव सादर केला जाणार आहे. यानुसार आडसाली ऊस पिकासाठी हेक्टरी ८ हजार ५०० रुपये, तर खोडवा उस पिकासाठी हेक्टरी ५ हजार ७५० रुपये पीक कर्जात वाढ करण्याची मागणी केली आहे.

शेतकऱ्यांची कर्ज खाती जास्त होत असल्यामुळे सुरू व खोडवा पिकासाठी सरासरी सव्वा लाख रुपये पीक कर्ज मिळावे, अशी मागणी शेतकऱ्यांतून होत आहे.

नाबार्डकडून पुढील हंगामामध्ये पीक कर्जाकरिता खेळते भांडवली कर्जदाराबाबत जिल्हाधिकारी कार्यालयात बैठक झाली. यावेळी जिल्हास्तरीय पीक कर्ज कमिटीने ५ टक्के कर्ज दरात वाढ सुचविली आहे. दरवाढीचा निर्णय राज्यपातळीवर, नंतर नाबार्डमध्ये होणार आहे. इंधन, खत व मजुरीचे वाढलले दर तसेच एकूण उत्पादन खर्च वाढल्याने शेतकऱ्यांतून पीक कर्ज दरात वाढ व्हावी, अशी मागणी होत होती.

याबाबत कोल्हापूर जिल्हा बँकेचे प्रभारी मुख्य कार्यकारी अधिकारी जी. एम. शिंदे यांनी दिलेल्या माहितीनुसार, जिल्हास्तरीय कमिटीने पुढील हंगामासाठी ऊस पिकासाठी प्रतिहेक्टरी ५ टक्के वाढीव कर्जदर सुचविला आहे. दर शिफारस करून प्रस्ताव राज्याला पाठविला आहे. सरकारकडून पुढील आदेश आल्यानंतर अंमलबजावणी केली जाणार आहे. असे शिंदे यांनी माहिती दिली.

ऊस लागणीसाठी पीक कर्ज सुरुवातीला दिले जाते. लावन ऊस सुरुवातीला तुटतो. खोडवा हंगामाच्या शेवटी तुटतो. यामुळे संस्था पातळीवर ज्यादा खाती होतात. सुरू हंगामासाठी सुरू कर्ज, खावटी कर्ज व आकस्मित कर्ज, तसेच खोडवा पिकासाठी खोडवा कर्ज, खावटी कर्ज, आकस्मित कर्ज अशी सहा खाती, सहा वेगवेगळे पेमेंट दिले जाते.

यामुळे संस्था संगणकीकरणात अनेक अडचणी निर्माण होतात. तसेच शासनाला व्याज परतावा देण्यासाठी टप्पे करावे लागतात. यामुळे शेतकऱ्यांचा व संस्थेचाही मेळ बसत नाही.