Banglore News: रॉयल चॅलेंजर्स बंगळूर (आरसीबी) संघाने ‘आयपीएल’चा अंतिम सामना जिंकल्यानंतर बुधवारी (ता. ४) बंगळूरमध्ये काढलेल्या विजयी रॅलीमध्ये चेंगराचेंगरीत ११ जणांचा मृत्यू झाला असून, पन्नासहून अधिक जण जखमी झाले आहेत.

अहमदाबाद येथे मंगळवारी (ता. ३) आयपीएलचा अंतिम सामना झाला. त्यानंतर बंगळूरमध्ये बुधवारी रॅली काढण्यात आली. या वेळी चाहत्यांची संख्या प्रचंड होती आणि त्यांना आवरणे पोलिसांना अवघड झाले. मिरवणूक काढण्याचे नियोजन आखले गेले होते. पण गर्दी नियंत्रणाबाहेर गेली आणि त्यात चेंगराचेंगरी झाली.

‘आरसीबी’चा संघ बुधवारी दुपारी २ वाजता बंगळूरमध्ये दाखल झाला आणि कर्नाटकचे उपमुख्यमंत्री डी. के. शिवकुमार हे खेळाडूंच्या स्वागतासाठी विमानतळावर पोहोचले. त्यानंतर खेळाडूंचा सत्कार समारंभ विधान भवन येथे पार पडला. तेथेही प्रचंड गर्दी होती आणि नियोजित कार्यक्रमानुसार बंगळूरचा संघ तिथून चिन्नास्वामी स्टेडियमवर येणार होता. पण विधान भवन येथे सत्कार सोहळा सुरू असताना चाहत्यांची स्टेडियमवर गर्दी उसळली.

४० हजार प्रेक्षक क्षमता असलेल्या या स्टेडियमच्या बाहेर जवळपास ४ ते ५ लाख लोकांनी गर्दी केल्याचे सांगण्यात येत आहे. त्यांना रोखण्यासाठी फक्त ५००० पोलिस सुरक्षेसाठी तैनात होते. गर्दी आवाक्याबाहेर गेली असताना त्यांना पांगवण्यासाठी पोलिसांनी लाठीमारही केला. गेटजवळ घडलेल्या या प्रसंगात चेंगराचेंगरी झाली.

या प्रकरणाबाबत डी. के. शिवकुमार यांनी सांगितले, की १८ वर्षांनंतर ‘आरसीबी’ने जेतेपद जिंकले याचा आम्हाला अभिमान आहे. कोहलीच्या एकनिष्ठेचे फळ मिळाले. पण संघाचा विजयोत्सव साजरा करण्यासाठी मोठ्या संख्येने लोक जमा झाले. गर्दीला आवरणे अवघड झाले होते. मी यासाठी बंगळूर आणि कर्नाटकच्या लोकांची माफी मागतो. आम्हाला मिरवणूक काढायची होती, पण गर्दी अनियंत्रित झाली. त्यामुळे मिरवणूक रद्द करण्यात येत आहे.