Nagpur News : एक एकरातून एक लाख रुपयांचे उत्पन्न घेणाऱ्या शेतकऱ्यांना यापुढे रेशीम रत्न पुरस्कार देऊन सन्मानित करण्यात येणार आहे. रेशीम संचलनालयाच्या पाठपुराव्यानंतर सहकार, पणन व वस्त्रोद्योग खात्याने गुरुवारी (ता.२२) या संबंधीचा शासन आदेश काढला. पुणे, छत्रपती संभाजी नगर, अमरावती, नागपूर या चार विभागांतील ६१२ शेतकऱ्यांना पहिल्यावर्षी हा पुरस्कार देण्यात येईल. त्यासाठी १५ लाख ९८ हजार रुपयांची तरतूद केली आहे.

राज्यात रेशीम शेतीतून अनेक शेतकऱ्यांनी एकरी एक लाख रुपयांचा परतावा मिळविला आहे. त्यामुळेच शासनाने राज्यात रेशीम शेतीला प्रोत्साहन देण्याचा निर्णय घेतला आहे. त्या अंतर्गत एकरी एक लाख रुपये किंवा त्यापेक्षा अधिक उत्पन्न घेणाऱ्या शेतकऱ्यांना गौरविले जाणार आहे. पहिल्या पुरस्कारासाठी ११ हजार रुपये, दुसऱ्यासाठी ७५०० व तिसऱ्यासाठी ५००० रुपये याप्रमाणे जिल्हानिहाय्य बक्षीस रक्‍कम निश्‍चित केली आहे.

याकरिता शेतकऱ्यांना जिल्हा रेशीम कार्यालयाकडे विहित नमुन्यात अर्ज सादर करावा लागेल. पुरस्कारार्थीच्या निवडीसाठी रेशीम संचालकांच्या अध्यक्षतेत कृषी संचालक (विस्तार), उपसचिव (रेशीम), संबंधित जिल्ह्याचे रेशीम विकास अधिकारी, उपसंचालक प्रादेशिक रेशीम संचालनालय यांची समिती स्थापन केली आहे.

पुणे विभागातील सात जिल्ह्यांतून १९५, छत्रपती संभाजी नगर विभागाच्या आठ जिल्ह्यांतून १४१, अमरावती विभागातील पाच जिल्ह्यातील २४८, नागपूरच्या सहा जिल्ह्यातील २६ शेतकरी पुरस्कारासाठी निवडण्यात येतील.

...असे आहेत निकष

- रेशीम कोश उत्पादक असावा

- रेशीम कार्यालयात नोंदणी करावी

- प्रती १०० अंडीपुंजास किमान ६० किलो कोश उत्पादन

- कोश विक्रीची पावती

- एक एकरावर तुती किंवा टसर लागवड

- निकषानुसार किटक संगोपनगृहाचे बांधकाम

...असा आहे रेशीम गोशवारा

नोंदणीकृत शेतकरी ः १७४७१

तुती लागवड ः १८५३० एकर

गाव संख्या ः २४०९

कोश उत्पादन ः ३७४७ टन

अंडीपुंज वितरण ः ५६.५५ लाख

चॉकी वितरण ः ४५ लाख (८० टक्‍के)