Washim News : वाशीम जिल्ह्यात यंदाच्या हंगामात गेले काही दिवस सतत पाऊस होत असल्याने पिकांचे नुकसान होण्याची शक्यता तयार होऊ लागली. जिल्ह्यात आतापर्यंत सरासरी ५६९ मिलिमीटरच्या तुलनेत ६१९ मिलिमीटर म्हणजेच १०८ टक्के पाऊस झाला आहे. सतत, दिवसाआड पाऊस येत असल्याने काही ठिकाणी सोयाबीनचे पीक पिवळे पडते आहे.

वाशीम जिल्ह्यात कारंजा व रिसोड तालुके वगळता उर्वरित ठिकाणी १०० टक्क्यांवर पाऊस झाला. वाशीममध्ये ६६५ मिलिमीटर (१०१ टक्के), रिसोड ५४१ (९६ टक्के), मालेगाव ७६७ (१३७ टक्के), मंगरूळपीर ६६० (१२७ टक्के), मानोरा ५८२ (११३ टक्के) तर कारंजामध्ये ४९० (९० टक्के) पाऊस नोंद झालेली आहे.

मागील काही तासांपासून जिल्ह्यात विविध भागांत पाऊस सक्रिय झालेला आहे. प्रामुख्याने मंगरूळपीर तालुक्यात पाऊस अधिक प्रमाणात झाला. या तालुक्यात आसेगाव (२) मंडलात सर्वाधिक ४४.३ मिलिमीटर पाऊस पडला.

तर शेलू खुर्द २१ मिलिमीटर पाऊस पडला. अधूनमधून होत असलेल्या या पावसाने आता चिंतेत वाढ केली आहे. सोयाबीनचे पीक बहुतांश ठिकाणी फुलोरा, शेंगांमध्ये दाणे भरण्याच्या अवस्थेत आलेले आहे.

अशा काळात सूर्यप्रकाशाची नितांत गरज असल्याचे शेतकरी बोलत आहे. असेच वातावरण कायम राहिले तर सोयाबीनच्या उत्पादकतेला मोठा फटका बसू शकतो. प्रामुख्याने सखल भागात साचलेल्या पाण्यामुळे ओलावा कायम राहत आहे. या ठिकाणी पिकांची मुळे कुजत आहेत. पीक पिवळे पडण्याचे प्रकार होत आहेत.