Sindhudurg News : सिंधुदुर्ग जिल्ह्यात सुपारी पिकाला फळगळीचे ग्रहण लागले आहे. सुपारीची कोवळी फळे गळून पडत असल्याने शेतकऱ्यांची चिंता वाढली आहे. दोडामार्ग आणि सावंतवाडी तालुक्यांत ७० टक्क्यांपेक्षा अधिक फळगळीने नुकसान झाले आहे. कोळेरोग आणि बुरशीमुळे फळगळ होत असल्याचा सुपारी बागायतदारांचे म्हणणे आहे.

जिल्ह्यात या वर्षी ६ जुलै ते २० जुलै या कालावधीत सतत अतिवृष्टी झाली. त्यानंतर ऑगस्टमध्ये देखील पावसाचा जोर कायम राहिला. परंतु या कालावधीत सुपारी पिकांमध्ये फळगळ झालेली नाही.

परंतु १५ ऑगस्टनंतर जिल्ह्यात पावसाचा जोर कमी झाला आणि ऊन पावसाचा खेळ सुरू झाला. त्यानंतर जिल्ह्यातील सुपारी पिकांवर कोळेरोग आणि बुरशीचा प्रादुर्भाव व्हायला सुरुवात झाली. दोडामार्ग आणि सावंतवाडी तालुक्यांतील अनेक गावांमध्ये सुपारीची मोठी लागवड आहे. या गावांमध्ये ऑगस्ट अखेरपासून फळगळीला सुरुवात झाली.

शेतकऱ्यांनी फळगळ थांबण्यासाठी फवारण्यादेखील केल्या. परंतु त्याचा तितकासा परिणाम झाला नाही. सुपारीच्या झाडाखाली कोवळ्या फळांचा खच साचला आहे. झाडावरील ७० टक्के फळे जमिनीवर पडली आहेत. त्यामुळे शेतकऱ्यांचे मोठे नुकसान झाले आहे. कीटकनाशक, बुरशीनाशकांचा कसलाही परिणाम होत नसल्याने शेतकऱ्यांची बैचेनी वाढली आहे.