Akola News : सोयाबीन सोंगणीचा हंगाम शिगेवर असून याच काळात आता पाऊस पुन्हा धुमाकूळ घालू लागला आहे. बुधवारी (ता.९) सायंकाळी अनेक भागांत जोराचा पाऊस झाला. या पावसाने सोंगणी केलेल्या सोयाबीनच्या सुड्या भिजल्या आहेत. वादळी वाऱ्यासह पाऊस झाल्याने अनेक ठिकाणी कपाशीच्या शेतात झाडावरील फांद्या तुटून पडल्या. वीज पडून मालेगाव तालुक्यात एका शेतमजुराचा मृत्यू झाला.

अकोला जिल्ह्यात बार्शीटाकळी तालुक्यातील पिंजर व परिसरात जोरदार पाऊस झाला. कारंजा-पिंजर मार्गावरील पुलावरून पुराचे पाणी वाहत होते. सायंकाळी सहा ते रात्री नऊ वाजेपर्यंत पावसाने धुमाकूळ घातला. जिल्ह्यात अकोट तालुक्यातही विविध ठिकाणी जोरदार वादळी पाऊस झाला. बुलडाणा जिल्ह्यात खामगाव, जळगाव जामोद, संग्रामपूर, चिखली, मेहकर आदी तालुक्यांमध्ये पाऊस झाला. वाशीम जिल्ह्यात मालेगाव तालुक्यात पावसाने हजेरी दिली.

या पावसाने काढणी सुरू असलेल्या सोयाबीनचे नुकसान होऊ शकते. सोंगणी केलेल्या सुड्या भिजत असून त्यातून कोंब येऊ शकतात. मालाचा दर्जाही खालावू शकतो. दुसरीकडे हाच पाऊस तुरीच्या पिकासाठी फायदेशीर ठरणार आहे.

वीज पडून शेतमजूर मृत्यू

मालेगाव (जि. वाशीम) तालुक्यातील सुदी शेतशिवारात प्रकाश मनोहर कांबळे (वय ३२) या शेतमजूर युवकाच्या अंगावर वीज पडल्याने मृत्यू झाला. तर शुभम रंजित मोहळे (वय २८) हा युवक गंभीर जखमी झाल्याची घटना बुधवारी घडली. यवतमाळ जिल्ह्यातील पांढुर्णा येथील काही महिला व पुरुष आपल्या कुटुंबासमवेत सोयाबीन कापणीच्या कामासाठी राजुरा शेतशिवारात आलेले आहेत. प्रकाश कांबळे हा सुद्धा त्याची पत्नी ज्योत्स्ना (वय ३० वर्षे ), मुलगी नंदिनी (वय ८ वर्षे) व भाऊ पंकज (वय २१) यांच्यासमवेत सोयाबीन पीक कापणीच्या कामासाठी आलेला होता. प्रकाश कांबळे हा राजुरा येथील सुनीता रंजित मोहळे यांच्या शेतात सोयाबीन कापणीचे काम करीत होता. दरम्यान, प्रकाशच्या अंगावर वीज पडली. त्याच्या बाजूलाच असलेल्या शेत मालकाचा मुलगा शुभम रंजित मोहळे (वय २८) याला धक्का बसला. रुग्णालयात नेत असतानाच प्रकाश कांबळे याचा मृत्यू झाला.