Gondia News : प्रभारी कृषी विकास अधिकाऱ्याने कृषी सेवा केंद्र चालकांकडून तपासणीआड पैसे वसुली केल्याचा धक्कादायक प्रकार समोर आला आहे. जिल्हा परिषद उपाध्यक्षांनी या बाबत थेट मुख्य कार्यकारी अधिकाऱ्यांकडे तक्रार केली.

त्यामुळे या प्रकरणात काय कारवाई होते हे पाहणे औत्सुक्याचे ठरणार आहे. जिल्ह्यात खरिपाच्या तोंडावर खताची साठेबाजी होत शेतकऱ्यांवर वाढीव दराने खत खरेदीची वेळ आली आहे. याविषयी शेतकऱ्यांनी जिल्हा परिषद उपाध्यक्ष सुरेश हर्षे यांच्याकडे तक्रारी केल्या होत्या. त्याची दखल घेत जिल्हा परिषदेचे प्रभारी कृषी विकास अधिकारी प्रमोद कागदीमेश्राम यांना काही कृषी सेवा केंद्राची तपासणी करा, अशी सूचना केली.

परंतु नव्या शासन आदेशानुसार कृषी विकास अधिकाऱ्यांचे तपासणीचे अधिकार काढल्याचे सांगत हे काम करण्यास श्री. कागदीमेश्राम यांनी नकार दिला. मात्र त्यानंतर काही वेळातच ते आमगाव येथील जय भवानी कृषी सेवा केंद्र व त्यानंतर कटीपार येथील कृषी सेवा केंद्राची तपासणी करून पैशाची मागणी करीत असल्याचे व्यावसायिकांनी फोनवरून हर्षे यांना कळविले.

त्यानंतर गोरेगाव तालुक्‍यातूनही श्री. कागदीमेश्राम यांनी पैशाच्या मागणीबाबत फोनवरून व्यावसायिकांनी माहिती दिली. या वेळी फोनवरून श्री. मेश्राम यांच्याशी उपाध्यक्ष सुरेश हर्षे यांनी संवाद साधला असता त्यांनी चूक झाल्याची कबुली दिली.

मात्र श्री. हर्षे यांनी ही बाब गांभीर्याने घेत थेट जिल्हा परिषदेचे मुख्य कार्यकारी अधिकारी एम. मृगनाथन यांना या बाबत माहिती देत श्री. मेश्राम यांच्यावर कारवाईची सूचना केली.