Kolhapur Politics : महाविकास आघाडीकडून माजी आमदार उल्हास पाटील आणि सुजीत मिणचेकर यांनी शिवसेना ठाकरे गटाला रामराम करत स्वाभिमानी शेतकरी संघटनेचा झेंडा हाती घेतला आहे. यावेळी स्वाभिमानीकडून उल्हास पाटील हे शिरोळ विधानसभेतून उमेदवारी अर्ज दाखल करणार आहेत तर सुजित मिणचेकर हे हातकणंगले विधानसभा मतदार संघातून अर्ज दाखल करणार आहेत. माजी खासदार राजू शेट्टी आणि माजी आमदार उल्हास पाटील तब्बल दहा वर्षांनंतर शिरोळच्या मैदानात एकत्र दिसणार आहेत.

महाविकास आघाडीने उमेदवारी नाकारल्यानंतर माजी आमदार उल्हास पाटील यांनी थेट नाराजी व्यक्त केली. गतवेळच्या निवडणुकीत तालुक्यातील कोणत्याही नेत्यांच्या पाठबळाशिवाय जवळपास ६१ हजार मते त्यांनी घेतली होती. स्वाभिमानीकडून उल्हास पाटील यांना प्रस्ताव दिल्यानंतर त्यांनी तो स्विकारून स्वाभिमानीमार्फत शिरोळची निवडणूक लढविण्याचा निर्णय कार्यकर्त्यांच्या बैठकीत घेतला. माजी खासदार राजू शेट्टी यांच्या शिरोळ येथील निवासस्थानी सोमवारी (ता.२८) रात्री उशिरा झालेल्या कार्यकर्त्यांच्या बैठकीत उल्हास पाटील यांची उमेदवारी निश्चित झाली.

कारखानदार विरुद्ध शेतकरी संघटना

शिरोळ तालुक्याला शेतकरी चळवळीची पार्श्वभूमी आहे. शेतकरी प्रश्नावर राजू शेट्टी यांनी आमदारकी, खासदारकी तर शेतकरी चळवळीच्या मुशीतून तयार झालेल्या उल्हास पाटील यांनीदेखील आमदारकी मिळवली. शेतकरीविरुद्ध कारखानदार या संघर्षातच या दोघांनी आमदारकी, खासदारकी गाजवली आहे.

जरांगे पाटील यांची तोफ धडाडणार

राजू शेट्टी आणि उल्हास पाटील या दोघांचेही घनिष्ठ संबंध असणाऱ्या मराठा आरक्षणाचे नेते मनोज जरांगे पाटील यांच्याशी शेट्टी आणि पाटील या दोघांनीही चर्चा करून येणाऱ्या काळात प्रचारासाठी निमंत्रित केले. जरांगे पाटील यांनीही शिरोळमध्ये येण्याची ग्वाही दिल्याने जरांगे पाटील यांची तोफ शिरोळच्या आखाड्यात धडाडणार आहे.