Mumbai News : महाराष्ट्र कृषी-उद्योग विकास महामंडळाकडून विकसित केलेल्या महाॲग्रोमार्ट ई-पोर्टलला स्कॉच हा राष्ट्रीय पुरस्कार, स्कॉच समूहाचे संस्थापक समीर कोचर यांच्या हस्ते पुरस्कार प्रदान करण्यात आला. महामंडळाचे व्यवस्थापकीय संचालक डॉ. मंगेश गोंदावले, महाव्यवस्थापक सुजित पाटील व व्यवस्थापक किशोर राठोड यांनी हा पुरस्कार स्वीकारला.

महाॲग्रोमार्ट ई-पोर्टल हे संपूर्ण भारतात शेतकरी व शेती संलग्न व्यवसायाचे एकाच छताखाली खरेदी व विक्री करणेसाठीचा ऑनलाइन प्लॅटफॉर्म असून स्कॉच महाॲग्रोमार्ट या नवीन उपक्रमाचे सादरीकरण स्कॉच निवड समिती समोर ठेवण्यात आले होते.

शेतकऱ्यांनी पिकविलेला शेतीमाल विक्री करताना अनेक अडचणींना सामोरे जावे लागते. दर्जेदार शेतीमाल असतानाही अपेक्षित मोबदला मिळत नाही. ही समस्या ओळखून महाॲग्रोमार्ट हा ऑनलाइन प्लॅटफॉर्म विकसित केला आहे.

या ॲपच्या माध्यमातून शेतकऱ्यांना शेतीशी संबंधित उत्पादने व इतर कृषी निविष्ठा खरेदी करता येते. महाॲग्रोमार्ट ॲपद्वारे शेतकऱ्यांनी, शेतकरी उत्पादक कंपन्यांनी, महिला बचत गट, व्यावसायिकांनी उत्पादने उत्पादित करून सुव्यवस्थित पॅकिंग केलेल्या मालाची थेट विक्री या ॲपद्वारे सुरू करण्यात आलेली आहे.