Ambegaon News : आंबेगाव तालुक्याच्या पश्‍चिम पट्ट्यातील आदिवासी डोंगराळ भागातील गावांमध्ये भात काढणी व झोडणीच्या कामांनी वेग घेतला आहे. तालुक्याच्या पश्‍चिम पट्ट्यातील आहुपे खोरे, भीमाशंकर खोरे तसेच गोहेच्या खोऱ्यातील गावांमध्ये शेतकरी तांदूळ पीक मोठ्या प्रमाणावर घेतात.

पूर्वी या भागात आंबेमोहोर, रायभोग, खडक्या, जीर या वाणाचे तांदूळ पीक घेतले जात होते. आता जास्त उत्पादन देणाऱ्या सुवासिक इंद्रायणी वाणाचे तांदळाचे पीक घेण्याकडे शेतकऱ्यांचा कल वाढला आहे.

दोन आठवड्यापासून भात काढणीचा हंगाम सुरू झाला आहे. सध्या भात काढणी करून लगेच झोडणी करण्यावर शेतकरी भर देत आहे.

भात काढणीला आला असताना या परिसरात झालेल्या परतीच्या पावसाचा भात पिकाला फटका बसला शेतातील भात पिके आडवी झाली त्यामुळे उत्पादनात घट होणार आहे. असे डोण (ता. आंबेगाव) येथील शेतकरी नटवरलाल कृष्णा गवारी यांनी सांगितले.