Chhatrapati Sambhajinagar News : गंगापूर तालुक्यातील दूध उत्पादक शेतकऱ्यांनी दूध दर वाढ मागणीसाठी नवीन कायगाव येथील छत्रपती संभाजीनगर-नगर महामार्गावर रविवारी (ता. १९) रस्ता रोको आंदोलन केले. यावेळी वाहनांच्या रांगा लागल्या होत्या.

जोपर्यंत दुधाला प्रतिलीटर ५० रुपये भाव मिळत नाही तोपर्यंत डेअरीला दूध घालणार नाही. सर्व दूध उत्पादक शेतकरी संपावर जाऊ असा आक्रमक पवित्रा घेत पावणेअकरापर्यंत रोडवर ठिय्या देत सरकारचा निषेध केले.

या आंदोलनात मुख्यमंत्री एकनाथ शिंदे, उपमुख्यमंत्री देवेंद्र फडणवीस, दुग्ध विकास मंत्री राधाकृष्ण विखे, उपमुख्यमंत्री अजित पवार यांच्या फोटोवर दूध टाकून शासनाच्या शेतकरी विरोधी धोरणाचा निषेध करण्यात आला.

शेतकरी नेते भाऊसाहेब शेळके, विनोद काळे पाटील, डॉ. उद्धव काळे पाटील, संदीप उंबरकर, राजेंद्र इष्टके, संपत रोडगे, नंदकिशोर बागल आदींनी दूध दराच्या बाबतीत भूमिका मांडली.

शासनाने येत्या दोन चार दिवसात दखल घेऊन ५० रुपये दर दिला नाही तर दूध उत्पादक शेतकरी संपावर जाणार आहेत. यानंतरचे तीव्र आंदोलन आंदोलन उभारणार असून याची गंभीर दखल शासनाने घ्यावी. असा इशारा देण्यात आला.

२१ तारखेला मुंबई येथे सह्याद्री अतिथिगृह येथे होत असलेल्या बैठकीस उपस्थित राहण्याचे पत्र विभागीय उपनिबंधक सहकारी संस्था (दूध)संभाजीनगर यांच्यावतीने आंदोलकांना देण्यात आले. मंडळ अधिकारी आर. डी.बेडवाल यांनी महसूल प्रशासनाच्यावतीने निवेदन स्वीकारले.

पोलीस पाटील व कायगाव, गणेशवाडी, लखमापुर, अमळनेर, भिवधानोरा, अगरवाडगाव ,गळनिंब, पखोरा, भेंडाळा, गुरु धानोरा, बोरुडी, शंकरपुर, वाहेगाव, जामगाव, गंगापूर, बगडी येथील दूध उत्पादक शेतकरी मोठ्या संख्येने सहभागी होते.

या आहेत मागण्या

४२ रुपये उत्पादन खर्च अधिक १५ टक्के नफा ग्राह्य धरून किमान ५० रुपये गाईच्या दुधाला भाव मिळावा.

पशुखाद्याचे ५० टक्के रेट कमी करण्यात यावे.

गाईच्या भाकड काळात पशुखाद्य साठी प्रति गाय २ हजार रु अनुदान द्या

वैद्यकीय सेवेसाठी अद्ययावत डॉक्टर, लॅबची सुविधा द्या.