Sangli News : यंदाच्या बेदाणा हंगाम निर्मितीसाठी जिल्ह्यातील नागज आणि सोलापूर जिल्ह्यातील जुनोनी परिसरातील बेदाणा शेड मालकांनी हंगामाची पूर्वतयारी सुरू केली आहे. सद्यःस्थितीला २५० हून अधिक शेडची डागडुजी आणि स्वच्छतेची कामे शेडमालकांनी हाती घेतली आहेत. पंधरा दिवसांपासून बेदाणा निर्मितीचा हंगाम सुरू होईल, असे बेदाणा शेड मालक आणि उत्पादक शेतकऱ्यांनी सांगितले.

सांगली जिल्ह्यातील नागज परिसरासह अन्य भाग आणि सोलापूर जिल्ह्यातील जुनोनी भागात जानेवारीच्या पहिल्या आठवड्यापासून बेदाणा निर्मितीचा हंगाम सुरू होतो. हंगामाची पूर्वतयारी डिसेंबरच्या दुसऱ्या आठवड्यापासून सुरू होते. मात्र गेल्या दोन ते तीन वर्षांपासून द्राक्ष हंगामातील फळ छाटणीदरम्यान, पडणारा अतिपाऊस आणि परतीच्या पावसामुळे द्राक्षाचे नुकसान होते. परिणामी, बेदाणा हंगाम लांबणीवर पडत आहे. त्यामुळे जानेवारीच्या मध्यापासून हंगामाची पूर्वतयारी केली जाते.

यंदाच्या हंगामातही फळ छाटणीला काही अंशी या पावसाचामुळे अडथळे निर्माण झाले. त्यातूनही शेतकऱ्यांनी फळ छाटणी केली. परंतु परतीचा पाऊस हा फळ छाटणी केलेल्या द्राक्ष पिकाला मारक ठरला. त्यामुळे जानेवारीच्या मध्यापासून बेदाणा निर्मितीचा सुरू होणारा हंगाम पंधरा ते वीस दिवस पुढे गेला.

नागज परिसरासह अन्य भाग आणि सोलापूरमधील जुनोनी भागात सुमारे ७ हजार बेदाणा शेड आहेत. सध्या २५० हून अधिक शेडची डागडुगी, स्वच्छता करण्याचे काम शेड मालकांनी हाती घेतले आहे. या कामासाठी स्थानिक आणि परराज्यातील अंदाजे ५०० मजूर दाखल झाले आहेत. उर्विरत शेडची दुरुस्ती आणि स्वच्छता फेब्रुवारीच्या पहिल्या आठवड्यात होण्याची शक्यता आहे.

गेल्या तीन ते चार वर्षांत कमी पाऊस, अतिवृष्टी यासह नैसर्गिक आपत्तीचा फटका बेदाणा निर्मितीला बसला. त्यामुळे या भागातील अंदाजे एक हजार शेडवर बेदाणा निर्मिती करण्याचे बंद करण्यात आले आहे. त्यामुळे यंदा पाच ते सहा हजार शेडवर बेदाणा निर्मिती होईल, असा अंदाज व्यक्त केला जात आहे. दरवर्षी बेदाणा शेडवर काम करण्यासाठी मध्यप्रदेश, बिहार यासह अन्य राज्यातील सुमारे २० हजारहून अधिक मजूर दाखल होता.