New Delhi News: मतदार यादीतील बनावट मतदारांवरून निवडणूक आयोगावर आरोप केल्यानंतर राहुल गांधी यांच्या नेतृत्वात सोमवारी (ता. ११) इंडिया आघाडीच्या ३०० खासदारांनी केंद्रीय निवडणूक आयोगाच्या मुख्यालयावर मोर्चा काढला. हा मोर्चा पोलिसांनी अडविल्याने खासदारांनी ठिय्या मांडला. दरम्यान पोलिसांनी राहुल गांधी, संजय राऊत, प्रियांका गांधी यांना ताब्यात घेतले आहे.

या मोर्चात इंडिया आघाडीतील २५ घटक पक्ष सहभागी झाले. मल्लिकार्जुन खर्गे, शरद पवार, संजय राऊत, अखिलेश यादव, प्रियांका गांधी आदी मोर्चात सहभागी झाले आहेत. ताब्यात घेतलेल्या खासदारांना संसद मार्ग पोलिस ठाण्यात नेण्यात आले. संसद भवन परिसरात तणावपूर्ण शांतता आहे. संविधान वाचविण्यासाठी आम्ही लढत आहोत. आम्हाला स्पष्ट आणि सुरक्षित मतदार यादी पाहिजे, ‘एक व्यक्ती एक मत’ यासाठी आमची लढाई असल्याचे राहुल गांधी यांनी सांगितले.

तर खासदार सुप्रिया सुळे म्हणाल्या की, आम्ही महात्मा गांधींच्या मार्गाने लढाई लढणार आहोत. दरम्यान ३० खासदारांना निवडणूक आयोगात भेटीसाठी परवानगी देण्यात आली आहे. जास्त खासदार आल्याने मोर्चा अडविण्यात आला, असे दिल्ली पोलिसांनी सांगितले.

विरोधी पक्षाच्या खासदारांनी कालच या मोर्चाची घोषणा केला होती. दिल्ली पोलिसांचे म्हणणे आहे की, विरोधी पक्षांनी औपचारिक परवानगीही मागितली नव्हती. तरीही, हा मोर्चा संसद भवनाबाहेर पडला आहे आणि त्यांना वाटेत रोखण्यासाठी कडक सुरक्षा व्यवस्था करण्यात आली आहे. यादरम्यान समाजवादी पक्षाचे प्रमुख अखिलेश यादव बॅरिकेड्सवर चढताना दिसले. प्रियांका गांधी देखील विरोधी पक्षाच्या खासदारांसोबत घोषणाबाजी करताना दिसल्या.

अखिलेश यादव म्हणाले, की निवडणूक आयोगाला अनेकवेळा प्रश्न विचारण्यात आले आहेत. जर तक्रार असेल तर निवडणूक आयोगाने कारवाई करावी. विशेषतः उत्तर प्रदेशात जिथे मतांची लूट होत आहे. त्यांनी म्हटले आहे की आम्हाला आमचा मुद्दा संसदेत मांडायचा आहे, पण सरकार ऐकू इच्छित नाही. दोषी लोकांवर कारवाई झाली पाहिजे.