Jalgaon News : खानदेशात रब्बीसाठी कांदा रोपवाटिका निर्मितीला वेग आला आहे. यंदा लागवड मात्र स्थिर राहील, असा अंदाज आहे. तसेच निसर्गावर कांदालागवड व पुढील उत्पादनाची गणितेही अवलंबून आहेत.

यंदा चांगला पाऊस खानदेशात झालेला आहे. वळवाचा पाऊस काही भागात झाला. त्यात कांदा रोपवाटिका निर्मितीसाठी कांदा बियाण्याची खरेदी शेतकरी अजूनही काही भागात करीत आहेत. लागवड डिसेंबरच्या मध्यात सुरू होईल, अशी स्थिती आहे. लाल कांद्याची अधिक लागवड होईल. यंदा सुमारे आठ ते नऊ हजार हेक्टरवर लागवड अपेक्षित आहे.

कांद्याचे दर स्थिर आहेत. गेल्या वर्षी खरिपातील किंवा नोव्हेंबरमध्ये काढणी झालेल्या कांद्याला प्रतिक्विंटल सरासरी १२०० रुपये दर मिळाला होता. तर किमान दर ५०० रुपये प्रतिक्विंटल, असा होता. नंतर एप्रिल, मे व आता जूनमध्येही उन्हाळ कांद्याला दर कमीच होता.

परंतु सध्या कांदा दर किमान कमाल तीन ते साडेतीन हजार रुपये प्रतिक्विंटल आहे. सरासरी दर अडीच हजार रुपये प्रतिक्विंटल, असा मिळत आहे. कांद्याचे एकरी १२० क्विंटलवर उत्पादन काही शेतकऱ्यांनी घेतले आहे. रोपवाटिकानिर्मिती काही जण व्यावसायिक स्वरूपात करीत आहेत. तर काही शेतकरी बियाणे खरेदी करून आपल्या पुढील लागवडीच्या नियोजनासंबंधी कांदा रोपवाटिका तयार करीत आहेत.

 चोपड्यात रोपवाटिका अधिक

व्यावसायिक रोपवाटिका चोपड्यातील अडावद, धानोरा, माचले, लासूर, मराठे आदी गावांसह यावलमधील साकळी, किनगाव, शिरसाड, चुंचाळे, आडगाव, डांभुर्णी, धरणगावमधील पथराड, चोरगाव, भुलपाटे, टहाकळी, दोनगाव, एरंडोलमधील खर्ची, रवंजे, धुळ्यातील साक्री, शिंदखेडा, धुळे आदी भागांत केल्या जात आहेत.

सुमारे १५० ते १८० हेक्टरवर या कांदा रोपवाटिका खानदेशात आहेत. अजूनही काही भागांत रोपवाटिका तयार केल्या जात आहेत. यंदा रोपवाटिकादेखील वाढलेल्या नसल्याची माहिती आहे. यामुळे लागवड स्थिर राहील, असे संकेत आहेत.