Sindhudurg News : जिल्ह्यातील शिरोडा वेळागर (ता. वेंगुर्ला) येथील पर्यटन प्रकल्पासाठी संपादित केलेल्या क्षेत्रापैकी ९ हेक्टर क्षेत्र वगळण्यात यावे या मागणीसाठी वेळागर येथील महिलांनी शुक्रवारी (ता. १६) खाडीत उतरून आंदोलन केले. जोपर्यंत मागणी पूर्ण होत नाही, तोपर्यंत आंदोलन सुरू ठेवण्याचा इशारा देखील शेतकरी महिलांनी दिला.

शिरोडा वेळागर येथील १२० एकर जमीन पर्यटन प्रकल्पासाठी संपादित करण्यात आली आहे. संपादित जमिनीपैकी ९ हेक्टर जमीन वगळण्यात यावी याकरिता १९९० पासून येथील ग्रामस्थ शासनाकडे पाठपुरावा करीत आहेत. अनेकदा आंदोलने करण्यात आली. परंतु शासनाकडून सकारात्मक निर्णय आजमितीस झालेला नाही.

त्यामुळे शिरोडा वेळागर येथील महिलांनी आता आक्रमक भूमिका घेतली आहे. एकीकडे याच विषयासाठी वेळागर येथील ग्रामस्थांनी मुंबईत आझाद मैदानावर उपोषण सुरू केले आहे. त्याचवेळी येथील महिलांनी शुक्रवारी वेळागर येथील खाडीपात्रात उतरून आंदोलन करण्यास सुरुवात केली.

पर्यटन प्रकल्पाला आमचा विरोध नाही परंतु ९ हेक्टर जागा वगळावी आणि प्रकल्पाचे काम सुरू करावे, अशी आमची मागणी असल्याचे महिलांकडून स्पष्ट करण्यात आले. आंदोलक महिलांशी माजी आमदार राजन तेली यांनी खाडीपात्रात जाऊन चर्चा केली.

या विषयासंदर्भात पर्यटनमंत्री गिरीष महाजन यांच्याकडे बैठक घेऊन भूमिका मांडणार असल्याचे श्री. तेली यांनी स्पष्ट केले. या आंदोलनात शैलजा गवंडी, शारदा आरोस्कर, महिमा नाईक, भाग्यश्री गवंडी, वनिता आरोस्कर, रसिका आरोस्कर, प्रणाली आरोस्कर, रामचंद्र आरोस्कर यांच्यासह अनेक महिला सहभागी झाल्या होत्या.