Akola News : यंदाच्या हंगामात शेतकरी सातत्याने अडचणीत आहे. आता रब्बी हंगामातसुद्धा शेतकऱ्यांना दुबार पेरणीला सामोरे जाण्याची वेळ येऊन ठेपली आहे. प्रामुख्याने हरभरा पिकात मर रोगाचा प्रादुर्भाव अधिक प्रमाणात झाल्याने अनेकांनी पीक नांगरून दुसऱ्या पिकाची पेरणी धरली.

या वर्षीच्या खरीप हंगामात या भागात जुलैमध्ये सार्वत्रिक पाऊस सुरू झाला. त्यावर पेरणी आटोपली. नंतर संपूर्ण ऑगस्ट महिन्यात खंड पडल्याने सोयाबीनसारख्या प्रमुख पिकाचे नुकसान झाले. नंतरच्या काळात गेल्या महिन्यात मॉन्सूनोत्तर पावसामुळे वेचणीचा कापूस भिजला. तुरीचे पीक जमीनदोस्त झाले.

रब्बीत लागवड केलेले हरभऱ्याचे पीक यंदा बुरशीजन्य रोगांनी घेरले आहे. पिकात मर रोग मोठ्या प्रमाणात वाढल्याने शेतकऱ्यांनी सरसकटपणे पीक मोडणीला प्राधान्य दिले. अकोला, वाशीम जिल्ह्यांत अनेक शेतकऱ्यांनी हरभऱ्याच्या उभ्या पिकावर ट्रॅक्टर फिरवला आहे.

या हंगामात अकोला, बुलडाणा, वाशीम या तिनही जिल्ह्यांत कमी प्रमाणात पाऊस झाला होता. त्यामुळे सुरुवातीला रब्बी लागवडीसाठी जमिनीत पुरेशी ओलच मिळाली नव्हती. सिंचनाची सोय असलेल्या काही शेतकऱ्यांनी हरभऱ्याची लागवड केली. शेतकऱ्यांनी अल्प पाण्याच्या उपलब्धतेवर रब्बीत हरभरा आणि गहू पेरला.

हरभरा पीक कोवळ्या अवस्थेत असताना मॉन्सूनोत्तर पावसाने थैमान घातल्याने शेकडो हेक्टरवरील हरभरा पिकाला त्याचा फटका बसला. सतत झालेल्या पावसामुळे जमिनीत मोठ्या प्रमाणात ओलावा निर्माण झाला. त्यामुळे बुरशीजन्य मर रोगाचा प्रादुर्भाव होऊन हरभऱ्याचे उभे पीक वाळू लागले. शेतकऱ्यांनी बुरशीजन्य औषधे वापरली. मात्र त्याचा कोणताही उपयोग होत नसल्यानं अनेक शेतकऱ्यांनी हताश होऊन या हरभरा पिकावर ट्रॅक्टर फिरवला.