Jalgaon News: खानदेशात मे अखेरीस पूर्वहंगामी किंवा बागायती कापूस लागवड सुरू झाली आहे. काही भागात कापूस पिकात बिजांकुरण झाले आहे. परंतु चांगला पाऊस झाल्याशिवाय कोरडवाहू कापूस लागवड टाळा, असे आवाहनही कृषी विभागाने केले आहे.

खानदेशात यंदा पूर्वहंगामी किंवा बागायती कापूस लागवडीस प्रतिसाद कमी आहे. कापूस पीक तोट्याचे, अल्प नफ्याचे ठरत आहे. मजूरटंचाईचा मोठा फटका कापूस पिकासंबंधी बसतो. कारण कापसात तीन ते चार फवारण्या, तीन ते चार वेळेस तणनियंत्रण करावे लागते. दुसरीकडे दसरा, दिवाळी सणाच्या वेळेस कापूस वेचणी सुरू होते.

सणासुदीचे दिवस असतानाच शेतात कापूस हंगाम सुरू होतो आणि मजूरटंचाईचा मोठा फटका बसतो. मजुरीदर वाढतात. या सर्व कारणांनी खानदेशात कापसाखालील क्षेत्रात मागील दोन वर्षांत मोठी घट झाली आहे. एकट्या जळगाव जिल्ह्यातील लागवड ५० हजार हेक्टरने मागील हंगामात कमी झाली.

यंदाही तशीच स्थिती आहे. काळ्या कसदार जमिनीत सोयाबीन, मका पेरणी करून पुढे त्यात हरभरा व अन्य रब्बी पिके घेण्याचे नियोजन अनेक कापूस उत्पादकांनी केले आहे. परंतु हलक्या, मध्यम जमिनीत कापूस लागवड सुरू आहे. संबंधित शेतकरी ठिबकवर कापूस लागवड करीत असून, पुढे त्यात मका व अन्य पिके घेवू, असे नियोजन करीत आहेत.

सातपुडालगत लागवड अधिक

खानदेशात पूर्वहंगामी कापसाची लागवड तापी नदीसह अनेर नदीकाठी लागवड दिसत आहे. ही लागवड मागील तीन ते चार दिवसांत झाली आहे. जळगाव जिल्ह्यातील रावेर, यावल, चोपडा तसेच जामनेर, अमळनेर, पारोळा, धुळ्यातील शिरपूर, धुळे, नंदुरबारातील तळोदा व शहादा, नंदुरबार भागातही पूर्वहंगामी लागवड झाली आहे. तसेच ही लागवड सुरूच आहे. या आठवड्यात लागवड वेग घेईल. मोसमी पाऊस सुरू होण्यापूर्वी लागवड बऱ्यापैकी होईल. १० जूनपर्यंत अपेक्षित लागवड अनेक भागात होईल, अशी माहिती आहे.