Sangli News: राज्यातील हस्त बहराला परतीच्या आणि मॉन्सूनोत्तर पावसाचा फटका बसला आहे. त्यामुळे सेटिंग न झाल्याने फूलगळ मोठ्या प्रमाणात झाली आहे. परिणामी फळांची संख्या कमी झाली असून हस्त बहरातील डाळिंबाचे उत्पादन ३० टक्क्यांनी घटणार असल्याचा प्राथमिक अंदाज डाळिंब उत्पादक शेतकऱ्यांनी व्यक्त केला आहे. बाजारात डाळिंबाची आवक कमी राहणार असून चांगले दर राहण्याचा अंदाजही व्यक्त केला जात आहे.

राज्यातील पश्चिम महाराष्ट्रासह नाशिक, अहिल्यानगर जिल्ह्यांसह अनेक भागांत हस्त बहर धरला जातो. त्यादृष्टीने शेतकऱ्यांनी नियोजनही केले होते. मात्र, सप्टेंबर ते नोव्हेंबर अखेर परतीचा आणि मॉन्सूनोत्तर पावसामुळे बहार धरण्यासाठी शेतकऱ्यांना तारेवरची कसरत करावी लागली. दरम्यानच्या काळात दिवसभर अतिउष्णता आणि रात्रीचे कमी तापमान कमी याचा फटकाही डाळिंब बागेला बसला. परिणामी ताण मिळाला नाही. त्यामुळे सेटिंग होण्यास अडचणी आल्या. तसेच फूलगळही मोठ्या प्रमाणात झाली.

दरम्यान, आगाप हस्त बहर धरलेले डाळिंब चांगले असून फळ संख्याही चांगली आहे. परंतु त्यानंतर म्हणजेच सप्टेंबर ते नोव्हेंबरमध्ये धरलेल्या बागांना फूलगळ झाल्याने डाळिंबाला अपेक्षित फळसंख्या मिळाली नाही. त्यामुळे डाळिंबाच्या उत्पादनात सरासरी ३० टक्के घट होईल, असे सांगण्यात येत आहे. सध्या फळाचे वजन २०० ते २५० ग्रॅमचे आहे. पोषक वातावरण असल्याने डाळिंबावर रोगाचा प्रादुर्भाव फारसा दिसत नसल्याचे चित्र आहे.

नैसर्गिक संकटाच्या कचाट्यात मृग आणि हस्त या दोन्ही बहरांतील डाळिंब पीक सापडले. त्यामुळे मृग बहरातील डाळिंबाचे उत्पादनही कमीच राहिले. आता हस्त बहरातील डाळिंबाचे उत्पादन निम्‍म्यावर येण्याचा अंदाज व्यक्त केला जात आहे. वास्तविक पाहता, मार्चमध्ये विक्रीसाठी काढणी सुरू झाल्यानंतरच डाळिंबाचे उत्पादन कितीने कमी झाले हे स्पष्ट होईल.

आंबिया बहराचे क्षेत्र वाढण्याची शक्यता

राज्यात आंबिया बहर जानेवारी ते फेब्रुवारीअखेर धरला जातो. आंबिया बहराचे सर्वसाधारण क्षेत्र २० हजार हेक्टर इतके आहे. आजअखेर १२ हजार बहर धरला आहे. मात्र, ऑक्टोबरअखेर पाऊस असल्याने हस्त बहरातील डाळिंबाचे सेटिंग झाले नाही. त्यामुळे हस्त बहरातील शेतकरी आंबिया बहराकडे वळाले आहेत. त्यामुळे आंबिया बहराचे क्षेत्र वाढण्याची शक्यता आहे.