New Delhi News : अदानी, संभळ या मुद्द्यांवरून विरोधी पक्षांनी केलेल्या गदारोळामुळे सलग पाचव्या दिवशी लोकसभा आणि राज्यसभा या दोन्ही सभागृहांचे कामकाज २ डिसेंबरपर्यंत तहकूब करण्यात आले.

अदानी वाद आणि उत्तर प्रदेशातील संभल येथे नुकत्याच झालेल्या हिंसाचारावर विरोधकांनी केलेल्या जोरदार निदर्शनामुळे लोकसभेचे कामकाज शुक्रवारी दुपारपर्यंत तहकूब करण्यात आले.

त्यानंतर पुन्हा सभागृहाची बैठक सुरू होताच काँग्रेससह विरोधी पक्षांच्या सदस्यांनी विविध मुद्दे उपस्थित करण्याचा प्रयत्न केल्यानंतर सभागृहात गदारोळ झाला अन् कामकाज पुन्हा दिवसभरासाठी थांबवण्यात आले.

लोकसभेत विविध विषयांवर विरोधी पक्षाच्या खासदारांनी मांडलेल्या स्थगन प्रस्तावाच्या नोटिसा लोकसभा अध्यक्ष ओम बिर्ला यांनी फेटाळल्या, तर राज्यसभेचे सभापती जगदीप धनखर यांनी नियम २६७ अन्वये विविध विरोधी पक्षांच्या सर्व १६ नोटिसा फेटाळल्या. दरम्यानच्या काळात, मुदत वाढवण्याचा प्रस्ताव मांडण्यात आला.