Mumbai News : सलग पडणाऱ्या मुसळधार पावसाने उरण तालुक्याला अक्षरशः झोडपून काढले आहे. त्यामुळे तालुक्यात पूरसदृश परिस्थिती निर्माण झाली असून भातशेतीत पाणी साठल्याने भाताची रोपे कुजून गेली आहेत. यामुळे शेतकऱ्यांचे मोठे नुकसान झाले आहे. जुलै महिन्याच्या अखेरीस तिबार पेरणीचे संकट शेतकऱ्यांना सतावत आहे.

सतत पडणाऱ्या पावसामुळे उरण तालुक्यातील पुनाडे, सारडे, पिरकोन, वशेणी, गोवठणे, पाले, आवरे, कडापे, पानदिवे, कोप्रोली, खोपटे, कळंबुसरे, चिरनेर भोम, कंठवली, विंधणे इत्यादी ग्रामीण भागातील शेतात पाणी साचले आहे. जून महिन्यात केलेली पहिली पेरणी अतिवृष्टीमुळे वाया गेली.

त्यानंतर शेतकऱ्यांनी घरी भाताची रोपे तयार करून ती शेतात लावली. त्याला ग्रामीण भागात ‘रो’ संबोधतात. या रोची दुसऱ्यांदा लावणी केलेली भाताची रोपेसुद्धा अतिवृष्टीमुळे पाण्याखाली गेली. बरेच दिवस त्यांना सूर्यप्रकाश न मिळाल्याने वाढीची प्रक्रियाच मंदावून भाताची रोपे कुजून वाया गेली आहेत. यामुळे शेतकऱ्यांचे मोठे नुकसान झाले आहे.

उरणमध्ये सलग आठवडाभर जोरदार पाऊस पडत आहे. सध्या पावसाचा जोर कमी झाला असला तरी शेतात साचलेले पाणी व गाळ भातपिकावर बसल्याने रोपांना यांचा फटका बसून वाढीवर परिणाम झाला आहे.

दुसऱ्यांदा केलेली पेरणी, पिके कुजल्यामुळे शेतकरी चिंतेत आहे. आता पुन्हा बी-बियाणांची जमवाजमव करण्याची वेळ शेतकऱ्यांवर आली असून तिसऱ्यांदा पेरणी करण्याचे संकट ओढावले आहे. शेतकऱ्यांना राज्य सरकारने तातडीने नुकसानभरपाई द्यावी, अशी मागणी शेतकऱ्यांनी केली आहे.