Jalgaon News : खानदेशात कांदा रोपवाटिका निर्मिती सुरूच असून, रोप लागवडयोग्य होण्यास एक महिना लागणार आहे. यंदा लागवड स्थिर राहील असा अंदाज आहे. तसेच पावसाचा योग्य अंदाज सध्या नाही. पुढील पावसावर लागवडीतील घट किंवा वाढ अवलंबून आहे.

सध्या काही भागात चांगला पाऊस आहे, तर काही भागात कमी पाऊस आहे. ऊनही पडते. पाऊस चांगला आहे, असेही दिसत नाही. रोपवाटिकांतील रोपांची वाढ सुरू आहे. कांदा बियाण्यांची खरेदी शेतकऱ्यांनी चढ्या दराने केली आहे. अजूनही काही भागात रोपवाटिका शेतकरी तयार करीत आहेत.

खरीप लागवड काही भागात ऑगस्टमध्ये सुरू होणार आहे. तर काही भागात लेट लागवड सप्टेंबरअखेरीस होईल. लाल कांद्याची अधिक लागवड होत असते. सध्या कांदा दर स्थिर असल्याने लागवडीत वाढीची अपेक्षा आहे. पण हंगामी खरीप कांदा लागवड कमी आहे. यात लेट खरीप कांदा लागवडीचे नियोजन अनेकांनी केले आहे. पण पावसाने नुकसान झाल्यास या लागवडींनाही फटका बसू शकतो. यंदा खानदेशात सुमारे १८ ते २० हजार हेक्टरवर लागवड अपेक्षित आहे.

गेल्या वर्षी खरिपातील किंवा नोव्हेंबरमध्ये काढणी झालेल्या कांद्याला चांगला दर नव्हता. नंतर एप्रिल, मे मध्येही दर कमी होते. पण जूनच्या मध्यानंतर कांदा दरात सुधारणा झाली. कांद्याचे एकरी अधिकचे उत्पादन घेण्याचा प्रयत्न शेतकरी करीत आहेत. रोपवाटिका निर्मिती काही जण व्यावसायिक स्वरूपात करीत आहेत.

काही शेतकरी बियाणे खरेदी करून आपल्या पुढील लागवडीच्या नियोजनासंबंधी कांदा रोपवाटिका तयार करतात. व्यावसायिक रोपवाटिका चोपड्यातील अडावद, धानोरा, माचले, लासूर, मराठे आदी गावांसह यावलमधील साकळी, किनगाव, शिरसाड, चुंचाळे, आडगाव, डांभुर्णी, धरणगावमधील पथराड, चोरगाव, भुलपाटे, टहाकळी, दोनगाव, एरंडोलमधील खर्ची, रवंजे, धुळ्यातील साक्री, शिंदखेडा, धुळे आदी भागांत केल्या जात आहेत.