Nashik News : सिन्नर कृषी उत्पन्न बाजार समितीच्या पांढुर्ली उपबाजार आवारात बुधवारपासून (ता. १७) श्रीराम नवमीच्या मुहूर्तावर कांदा लिलावाचा प्रारंभ सभापती शशिकांत गाडे यांच्या हस्ते करण्यात आला. या वेळी उपसभापती सिंधु कोकाटे, संचालक अनिल शेळके, प्रकाश तुपे उपस्थित होते.

अंदाजे १,४०० गोण्यांची आवक झाली. घोरवड येथील ज्ञानेश्वर हगवणे यांच्या कांद्याला मुहूर्ताला प्रतिक्विंटल कमाल १,५११ रुपये इतका दर मिळाला. पहिल्या दिवशी किमान ३००, कमाल १५११ व सारासरी १,३५० रुपये दर मिळाला.

पांढुर्ली पंचक्रोशितील शेतकऱ्यांनी कांदा गोणीमध्ये भरून लिलावासाठी दुपारी साडेतीनच्या आत पांढुर्ली उपबाजार आवारात आणावा, कांदा शेतीमालाचे लिलाव प्रचलित पद्धतीने दर सप्ताहाच्या सोमवारी, बुधवारी व शुक्रवारी होणार आहेत, अशी माहिती देण्यात आली.

व्यापारी नंदकुमार जाधव, अभिजित सोनवणे, दिलीप सोनवणे, सुजय सोनवणे, गणेश चौधरी, संदीप वराडे, देवेंद्र जाधव आदींनी कांदा लिलावात भाग घेतला. विलास हारक, हिरामण मंडलीक, नवनाथ आव्हाड, राजू गवळी, उत्तम चव्हाणके, सुदाम वाजे, किरण पवार, संजय तुपे, ज्ञानेश्वर हगवणे, सोमनाथ केदार, संजय पवार आदी शेतकऱ्यांनी कांदा विक्रीसाठी आणला होता.

या वेळी रमेश सकट, कैलास वाजे, पुंडलीक गायकवाड, मुकुंद वाजे, रतन वाजे, विष्णूपंत वाजे, निवृत्ती चव्हाणके उपस्थित होते. बाजार समितीचे सचिव विजय विखे, उपसचिव राजेंद्र जाधव, व्यवस्थापक रंगनाथ डगळे, अर्जुन भांगरे यांनी लिलावाचे कामकाज पाहिले.