Sangli News : जिल्ह्यातील भूजल पातळी खालावली आहे. भूजल सर्वेक्षण आणि विकास यंत्रणेतर्फे करण्यात आलेल्या मॉन्सूनोत्तर चाचणीचा अहवाल तयार झाला असून यात पाच वर्षांच्या तुलनेत या वर्षी एक मीटरने भूजल पातळीत घट झाल्याचे दिसून आले आहे.

पाच वर्षांतील सरासरी स्थिर भूजल पातळी ३.३४ मीटर होती. त्यात घट होऊन सप्टेंबरमधील स्थिर भूजल पातळी ४.३३ मीटरवर गेली आहे. मॉन्सूनोत्तर चाचणीतील या प्रकारच्या नोंदी चिंता वाढवणाऱ्या आहेत.

पाच वर्षांच्या तुलनेत सप्टेंबर २०२३ च्या नोंदी पाहिल्या, तर सर्वाधिक घट खानापूर तालुक्यात दिसून येते. सरासरी ३.५९ मीटर इतकी असते. ती आता ५.९२ झाली आहे. त्याखालोखाल कडेगावला ४.१७ वरून ५.७३ मीटर, मिरज तालुक्यात २.५२ वरून ३.८२ मीटर, शिराळ्यात १.०१ वरून १.९७ मीटर, जतमध्ये ४.८० वरून ५.५७ मीटरपर्यंत खाली गेली आहे.

वाळवा तालुक्यात १.८८ वरून २.५९ मीटर, कवठेमहांकाळ ४.०६ वरून ४.६८ मीटर, तासगावमध्ये ५.१६ वरून ५.७३ मीटर, आटपाडीमध्ये ४.०९ वरून ४.६४ मीटर, पलूसमध्ये २.११ वरून २.६० मीटर पातळी खालावली आहे.

...अशा निवडतात विहिरी

जिल्ह्यातील ४८ पाणलोट क्षेत्रांत ८६ विहिरींची नोंद घेतली जाते. जानेवारी, मार्च, मे आणि सप्टेंबर या महिन्यांत निवडलेल्या विहिरींतील पातळी तपासली जाते. निष्कर्ष जवळपास अचूक ठरावेत, यासाठी उपसा नसलेल्या या विहिरी असतात. २५ मीटरपर्यंत पाणी साठवून ठेवणारा खडक असतो. अर्थातच उथळ जलधर असलेल्या ठिकाणापर्यंत पाण्याचे मोजमाप करण्यात येते.