Nagar News : नगर जिल्ह्यात कापसाचे सरासरी १ लाख २२ हजार ८६ हेक्टर क्षेत्र असून, आतापर्यंत १ लाख ५० हजार ५२५ हेक्टरवर (१२३ टक्के) लागवड झाली आहे. यंदा अकोले तालुका वगळता सर्वच तालुक्यांत कापसाची लागवड आहे. मात्र दुष्काळाच्या झळा सोसणाऱ्या शेवगावसह नेवासा तालुक्यांत सर्वाधिक कापसाचे क्षेत्र आहे. यंदा आतापर्यंत खरिपाची ६ लाख ६६ हजार ७३० हेक्टरवर (११५ टक्के) पेरणी झाली आहे.

जिल्ह्यात खरिपाचे ५ लाख ७९ हजार ७६८ हेक्टर सरासरी क्षेत्र आहे. यंदा पावसाच्या लवकर झालेल्या आगमनाने खरिपाच्या पेरण्याही लवकर उरकल्या आहेत. शेवगावसह नेवासा, श्रीगोंदा, पाथर्डी, राहुरी, कोपरगाव, श्रीरामपूर तालुक्यांतही कापसाचे क्षेत्र यंदा बऱ्यापैकी आहे. कापूस उत्पादनात शेतकरी नवीन तंत्रज्ञानाचाही वापर करत असल्याचे दिसून येत आहे. जामखेड, कर्जत तालुक्यांत मात्र कापसाचे क्षेत्र कमी झाल्याचा अंदाज आहे.

इतर खरीप पिकांत यंदा बाजरीचे क्षेत्र कमी होण्याचा अंदाज आहे. आतापर्यंत बाजरीची ७० हजार ५९५ (सरासरीच्या ४६.७६ टक्के) पेरणी झाली आहे. मुगाने सरासरी ओलांडली असून, त्याची ५० हजार ०५२ हेक्टरवर पेरणी झाली आहे. उडदाची सरासरीच्या दीड पट म्हणजे ६१ हजार १३५ हेक्टरवर पेरणी झाली आहे. सोयाबीनची दुपटीच्या जवळ म्हणजे १ लाख ५९ हजार ८०० हेक्टरवर, मक्याची ८० हजार हेक्टरवर, भाताची १४ हजार ३३२ हेक्टरवर पेरणी झाली आहे. भुईमूग, तीळ, कारळे, सूर्यफूल या तेलबियांची पेरणी मात्र अल्प झाली आहे.

कापूस लागवड (कंसात सरासरी क्षेत्र, हेक्टर)

नगर : ११९६ (१,५८६), पारनेर : ११३ (२५), श्रीगोंदा : ६,२९६ (२,८२२), कर्जत : ५,१४५ (६९१४), जामखेड : २०१ (४,५४९), शेवगाव : ४५,४४५ (३८,७६६), पाथर्डी : २७,०९३ (२८,८०६), नेवासा : ३२,९६८ (१९,८३८), राहुरी : १८,६२३ (९,७७६), संगमनेर : ३०७३ (६२७), कोपरगाव : १३५० (३,०९३), श्रीरामपूर : ७,१८० (४,०८८), राहाता : १८४२ (११९३).